Planta di Bubali Plas lo wordo traha ora cu RWZI wordo traslada pa Utilities NV

The content originally appeared on: Diario

Ing. Marlon Croes, director di DOW:

ORANJESTAD (AAN) – Director di Departamento di Obranan Publico, señor Marlon Croes, a sigui elabora den entrevista cu DIARIO, tocante a tema di un planta nobo pa Bubali Plas.

Croes a duna di conoce cu si no ta na aña 2021 tabata na aña 2022, cu a reserva un suma rond di 3.5 pa 3.8 miyon florin, pero un suma substancial pa cumpra pieza pa RWZI, cual a wordo cumpra. Y e suma cu mester financia ta 6 miyon pa haci un “voorzet” pa un planta nobo, “Lamentablemente, gobierno a draai esaki bek na aña 2022 y consecuentemente no por a tuma lugar”, Ing. Croes a subraya.

Esaki ta nifica cu mester warda te momento cu RWZI cay bao di Utilities pa construccion di un planta nobo tuma lugar.

Pa loke ta e planta, director di DOW a indica cu esaki tin diferente componente. Un di nan ta e “oxidatie sloot”, cu ta un zorg door di hinca oxigeno den e awa y tine halto. Pero tin mas pieza cu ta duna DOW dolor di cabes, pasobra e makinaria ta anticua, segun director Marlon Croes. Pero ora e traspaso tuma lugar, Utilities tin hopi mas capacidad financiero cu gobierno y cu DOW, cu nan por haci un inversion pa haci e traspaso di e planta.

El a agrega cu DOW ta trahando conhuntamente cu Parke riba un plan di maneho, den sentido di bisa ‘tal dia den tal periodo di aña’ nan tin cu corta un tiki di mata, tin cu saca awa dos pa tres bez pa aña segun e tempo cu ta miho. Ora Aruba ta drenta den temporada di awa (horcan), ta den riesgo cada bez cu awa ta subi. Tur esaki tin cu wordo monitorea. “E beheersplan tin cu bisa e nivel di awa cu nos mester mantene den Bubali Plas, cual ta e maximo y kico ta e medidanan cu mester tuma pa no yega eynan, y si e yega kico nos ta bay haci. Kiermen tur esey ta e plannan cu mester wordo traha”, Director di DOW a señala.

El a agrega cu durante e reunion na BRA a sali cierto recomendacionnan y un di nan ta pa bin cu un Comision di diferente disciplina, pa por duna gobierno conseho kico por haci den e siguiente añanan aki, te ora cu e planta nobo, drenta den operacion.