Plan Social pa esnan di LandsLab ta nifica hopi oportunidad pa empleadonan

admin

Sindicato SEPPA

Plan Social pa esnan di LandsLab ta nifica hopi oportunidad pa empleadonanORANJESTAD (AAN) “E traspaso of e pensamento pa Laboratorio a pasa over den un fundacion, den un “landsbesdrijf” of den un NV tabatin su historia hopi largo su tras y a dura nos hopi aña”, asina Magali Brito, secretario general di SEPPA a enfatisa despues di a firma e Plan Social pa su miembronan trahando na Lands Laboratorium. Na final Minister Schwengle a dicidi di opta pa lanta un fundacion bou di Hospital, pa cual di aña pasa a negocia con lo trata e trahadonan.

Diabierna ultimo Gobierno, Hospital y SEPPA a firma e plan social pa e mas o menos 60 empleadonan trahando na Lands Laboratorium. E negociacionnan a dura algun tempo y a finalisa un trayecto di mas di 20 aña, di cual varios Gobierno a purba pero na final Minister Dr. Alex Schwengle a logra e trayecto aki.

Sindicato SEPPA a aclaria cu den un plan social ta regla con e trahadonan aki, di cual mayoria ta ambtenaar, kico lo ta nan condicionnan di trabao y kico ta nan posibilidadnan si acaso nan no ta di acuerdo pa bay bou di e fundacion nobo.

 

Tambe tin e otro grupo, e arbeidscontractantnan cu tin un contract cu Gobierno pero cu cada aña ta renoba di nobo, pues cu ta insigur den nan trabao di kico lo sosode cu nan. Ta conoci cu dos aña pasa e mesun Gobierno aki a cuminsa cu un trayecto di baha man cu e contractantnan, cu consecuencia cu decenas a perde nan trabao na varios departamento di Gobierno.

“Pues den e caso aki e plan social cu nos a firma ta regla cu nan por bay den e fundacion aki, asina cu nan contract cu Gobierno termina. Si nan kier haci esey prome cu e contract termina, nan ta liber pa haci’e tambe”, di acuerdo cu e lider di e ekipo negociado di SEPPA. El a sigui splica cu e ambtenaarnan lo traha awor na disposicion di e fundacion durante un periodo di 1 aña. Den e aña ey lo ofrece nan un funcion y kico ta e condicionnan di trabao cu cual nan lo mester bay sigui traha cune. “Anto e ta keda na e ambtenaar ey pa dicidi si nan lo acepta e funcion si of no. Mester ta cla cu den e un aña awor nan lo mantene tur nan condicionnan di trabao existente di Gobierno, pero for di momento cu nan dicidi di bay traha cu e fundacion nobo, e ora nan relacion di trabao cu Gobierno di Aruba ta termina oficialmente”.

Sin ningun duda cu e proceso aki, esta e negociacion pa un plan social, tabata masha importante mes. Pasobra ambos grupo, tanto e empleadonan publico cu kier siguridad di trabao, como e contractantnan cu kier sa con nan ta para. “Ami personalmente ta kere cu e logro aki ta crea un posibilidad grandi pa nan pasobra si bo ta bay bou di un fundacion, e ta un trabao mas sigur, mas stabiel y cu mas posibilidad den nan carera”, asina Magali Brito a termina bisando.

 

Next Post

A nenga Aserca Arlines pa mas vuelo pa Aruba

Aserca Airlines a bende miles di ticket sin aprobacion di Aviacion Civil di Aruba ORANJESTAD (AAN): Aserca Airlines a hinca su mes den un problema serio. A haci cosnan sin cu tin aprobacion di Aruba. Minister Otmar Oduber a pone pia abou duro den e situacion aki. No por permiti […]