Plan di Belasting di Gobierno lo yuda esnan cu salario di 3.000 cu apenas 21 Florin pa luna

The content originally appeared on: Diario

ATIA ta bati alarma


Esnan cu tin salario di 10.000 lo haya djis 99 florin extra pa luna 

ORANJESTAD(AAN): Diabierna Asociacion ATIA a tene un rueda di prensa, pa papia riba e plan di impuesto di 2023 cu Minister di Finanzas a presenta dia 30 di September.

   Director di ATIA Herrick Henriquez a splica cu e intencion ta pa semanalmente purba duna pida informacion di e impuestonan cu lo bin na 2023.

   “Den siman nos por a wak e efectonan di BBO y nos tur sa cu BBO ta bay subi di 6 pa 7% y cu den comercio esaki lo nifica realmente un aumento di 7.52% riba tur prijs cu tin”, segun Henriquez.

Diabierna el a enfoca riba inkomstenbelasting, unda cu el a indica cu a wordo splica na dje cu den cada nivel di entrada esaki lo baha cu 2%.

Segun e director, e ‘belastingvrije voet’, e parti cu ta liber di impuesto, ta bay subi di 28.862 florin pa 30.000 florin.

“Como comerciante nos ta ciudadano na prome lugar y e parti aki ta bay afecta nos tambe como ciudadano y e ta bay afecta e saco di pueblo”.

E parti unda cu e belastingvrije voet ta subi te cu 30.000 florin ta algo bon, pero tambe nan a baha schaal 4 di 107.000 pa 91.000.

Esaki ta nifica cu bo ta ‘shrink’ bo midden klasse hopi mas y manera cu Gobierno a splica, esey kiermen cu e ventaha ta pa salarionan te cu 120.000 florin, segun Henriquez.

El a duna un ehempel di algun cambio y a splica cu un salario di 42.000 florin pa aña awor ta paga un suma di impuesto di 1.576 pa aña, na 2023 ta bay paga un impuesto pa aña di 1.200 florin.

Esaki lo nifica un ventaha annual di 376 florin, cu ta nifica un ventaha pa luna di un tiki mas cu 30 florin.

“Den nos red nos a bay papia cu nos expertonan y nos a puntra nan kico e efecto ta bay ta di e diferente schaalnan”.

Un persona cu ta gana 2000 florin pa luna no ta bay paga belasting, pasobra e ta gana bao di 30.000 florin pa aña.

E persona cu ta gana 3000 florin pa luna, esta 36.000 florin pa aña ta bay paga 257 florin menos pa aña na belasting, cu ta nifica un ventaha di 21 florin pa luna, segun Henriquez.

El a splica cu e persona cu e ventaha mas halto ta esun cu ta gana 10.000 florin pa luna, pasobra e ta bay  paga 99 florin menos pa luna na belasting.

Segun e director, e desventahanan ta cuminza na salarionan net riba di 10.000 florin pa luna, pasobra e ora ey bo ta drenta schaal 4 y bo tin cu paga 50% di salario.

Pero prome cu e cambio e persona cu e salario di 10.000 florin tabata paga 4.626 mas na belasting.

“Un sistema husto ta uno den cual tur hende lo scapa placa”.

Nos a trece esaki dilanti pa compara e ventaha pa luna di tur hende, cu e aumento di gastonan den coriente, awa y gasolin por ehempel, segun Henriquez.