Placa central den negociacion Gobierno nobo di Reino

The content originally appeared on: Diario

Logro financiero Gobierno Arubano central den relacion nobo Reino

*Partidonan di Knops (CDA) y van Huffelen (D’66) rumbo oposicion

*Silencio ta rondona e diseño di e base di gobernacion Reino Hulandes 

ORANJESTAD(AAN)—Mientras Aruba ta goza di culminacion di Carnaval, e negociacionnan pa yega na un Gobierno nobo pa Hulanda y asina e base di un Gobierno nobo pa Reino Hulandes, ta continua.

E palabracionnan cu mester wordo alcansa den e combersacionnan entre partidonan Hulandes, lo tin resultadonan directo pa Aruba tambe debi na e hecho cu ta e Conseho di Ministro di Hulanda basicamente ta e Conseho di Ministro di Reino, cu tin un representante di cada pais autonomo den Reino.

Entrada di Cuaresma 2024 te awor por wordo considera como porta pa un constelacion nobo di gobernantenan den Reino cu sin duda lo contene exigencianan fuerte pa Aruba, Curacao y Sint Maarten riba tereno di gobernacion.

DIARIO corectamente a informa Aruba, cu e maneho cu a wordo hiba y ta wordo hiba dor di Gobierno di mr. Evelyn Wever-Croes, sigur riba tereno financiero, ta hunga e papel mas importante den e pakete total di relacionnan den Reino, cu lo ta parti di e maneho di e Gobierno nobo di Reino.

Cu ora ta papia di futuro di e Gobierno Hulandes y Gobierno di Reino Hulandes, mester papia di cambio, ta bini sigur dilanti den a partidonan cu actualmente ta negocia un gobierno Hulandes nobo, cu lo tin un base derechista cu bista principal riba un mehoracion di e condicionnan di bida di e Hulandes na e pais Hulanda.

E partido cu na forma abrumador a gana eleccionnan Hulandes, cu ta PVV di Wilders, a priminti su votadornan cu e miembronan di e comunidad Hulandes lo ta e alma di e gobernacion Hulandes nobo, cu lo uza e fondonan financiero di e pais pa garantisa e poblacion di Hulanda mihor condicionnan di bida.

Kico esaki lo encera te ainda ta un secreto pa Hulanda, Reino Hulandes y mundo, pasobra ainda e negociacionnan pa duna contenido na e Gobierno nobo, ta continua.

E factor financiero ta hunga un papel central pa e dirigente politico principal nobo di Gobierno Hulandes, Wilders, cu a bira un sorpresa historico pa Reino na urna Hulandes na 2023.

Ta wordo papia di uno di e negociacionnan mas intensivo cu Hulanda a conoce. Esaki sigur no ta ningun surpresa pasobra e partido principal cu ta PVV di Wilders ta presentador for di principio di cambio total di maneho na Hulanda.

VVD tabata e partido di Rutte, cu despues di a dirigi cuatro Gobierno, a wordo presenta cu un sorpresa desagradabel na urna electoral na 2023.

VVD cu un dirigente nobo mester forma parti di e Gobierno nobo dirigi pa Wilders y mester tene na consideracion tambe Pieter Omtzigt cu a causa furor electoral na Hulanda, despues cu el a kibra cu e partido CDA, cu a perde mitar di e asientonan cu e tabata tin den Tweede Kamer y a wordo bari for di mesa.

CDA tabata e partido di Raymond Knops, cu tabata e Secretario di Estado Hulandes cu a entrega na 2020 na Aruba e confirmacion cu Gobierno Mike Eman a laga Aruba atras den estado di bancarota.

Ni e partido di Raymond Knops, CDA, cu ta mantene lazonan estrecho cu AVP di Aruba, despues di e derota electoral na Hulanda, ni e partido di Alexandra van Huffelen, lo ta den e Gobierno nobo Hulandes, cu ta den formacion.

E prome informacionnan di DIARIO despues cu e resultado di eleccion Hulandes a bira conoci na Aruba, tabata cu Wilders lo no ta tolerante como dirigente di Gobierno di Reino.

E informacionnan di DIARIO cu por spera exigencianan enorme pa gobernacion na Aruba, a base di e mal gobernacion y abuso di placa di Pueblo di Aruba cu tabata marca e Gobierno di Mike Eman, ta keda vigente.

E resultado di gobernacion for di 2017 bou liderazgo di Prome Ministro Evelyn Wever-Croes, cu a marca historia cu e saldo positivo y e recuperacion di Aruba cu el a logra durante momentonan mundial dificil, ta loke Reino lo sigui exigi di Aruba pa asina entrega na e Pueblo di Aruba e confirmacion cu maneho di Prome Ministro Evelyn Wever-Croes ta coresponde cu e leynan cu ta regla bon gobernacion di e pais.

Silencio ta rondona e formacion di un Gobierno Hulandes, cu lo bira e Gobierno di cambio pa Reino Hulandes cu exigencianan enorme pa futuro gobernantenan di Aruba cu sigur lo no por entrega proyectonan di PPS cu a pusha 1.6 Biyon Florin di e Arubiano den huma cu awor a bira parti di belasting cu tur hende mester paga orguyosamente manera priminti pa ex Prome Ministro Mike Eman hunto cu e debe nacional cu el a laga atras como herencia!