Petroleo y e menasa pa  mas peso riba costo di bida

The content originally appeared on: Diario

OPEC ta baha su produccion durante e ultimo lunanan di 2023

*2022 por cera cu petroleo atrobe riba 100 Dollar pa bari

*E menasa di fin di Petroleo a bira un enemigo pa mundo 

ORANJESTAD(AAN)—Durante e siman cu ta termina, Aruba a wordo confronta cu cantidad di asunto, cu a kita bista un rato for di e problema principal di mundo na e momentonan aki.

Si 2022 a bira un aña sumamente dificil pa mundo, tabata basa riba e hecho cu prijs di petroleo a subi drasticamente.

E motibo cu prijs di petroleo a subi, a wordo atribui directamente na e Guera di Ukraine, cu a wordo invadi dor di Rusia segun loke Vladimir Putin a presenta na mundo como su plan pa crea un Imperio Ruso nobo.

DIARIO for di inicio di 2022, a mustra riba e hecho cu e Guera na Ukraine por ta mucho mas cu e pretencion di Rusia pa haci henter mundo Comunista, cu ta e miho forma di dictadura cu mundo a conoce.

Esencial na 2022 mester a bira, e futuro nobo di mundo sin petroleo manera a keda acorda na e Conferencia di Clima cu a tuma lugar na Glasgow y caminda mundo a bay di acuerdo pa baha produccion di petroleo y gas y introduci combustibel limpi cu no ta afecta e medio ambiente.

For di momento cu e decision a wordo tuma, DIARIO a splica cu a mishi cu e balor financiero y economico mas grandi di mundo, cu a provoca e gueranan di petroleo cu a deshaci di stabilidad internacional den pasado.

DIARIO for di inicio di 2022 a mustra su lectornan pa den e desaroyonan actual, mira e interes di Rusia den sector di petroleo mundial.

Aruba sigur a mira den interes mundial petrolero, na prome lugar e mundo Arabe, considera como e baluarte petrolero.

Cu e dos podernan petrolero mas grandi na mundo ta Merca y Rusia, ningun hende a para keto.

Ukraine ta otro poz di petroleo di mundo.

For di momento cu e crisis di Ukraine a cuminsa, DIARIO a papia constantemente di un Guera di Petroleo, cu a causa un aumento di e prijs di petroleo na 2022.

Medidanan cu paisnan liber a tuma, a baha e efecto di e aumento di prijs y ya por a mira con e prijs di petroleo a baha.

Durante e siman cu ta termina, mundo a cuminsa reuni riba asuntonan relaciona cu clima y e medidanan cu mester tuma pa evita cu cambio di clima ta afecta hende.

Central den e reunion cu a cuminsa dia 6 di November y cu ta termina dia 18 di November ta naturalmente con ta atende cu combustibel.

Ta na momento cu mundo ta bay atende cu e futuro di petroleo, e organisacion mundial di petroleo OPEC cu ta conta tambe cu Rusia, a dicidi cu ta baha produccion di petroleo, loke ta nifica cu ta subi e prijs mundial di petroleo na entrada di e temporada di winter pa Europa, cu ta busca formanan pa bandona su dependencia di petroleo Ruso.

Den e situacion nobo, Rusia a anuncia cu e ta continua cu u plannan pa aumenta su produccion petrolero.

Indicacionnan na fin di siman ta papia di aumento di e prijs di petroleo prome cu fin di 2022 y cu e realidad di 100 Dollar pa bari ta bolbe.

Ayera a cera cu prijsnan di petroleo crudo riba mercado mundial.

DIARIO ta sigui tur desaroyo pa asina informa su lectornan di un desaroyo cu ta dicidi pa prijs na 2023!