Pelea di pareha a escala fuertemente banda di caminda na Bubali

The content originally appeared on: Diario

ORANJESTAD (AAN): Personanan cu Diadomingo marduga despues di 3’or tabata den cercania di e Shopping Center na Bubali,

a tende discusion fuerte andando, y e boroto ta bin for di un Pickup Double-Cabina color shinishi, cu tabata bin di pabao y a dicidi na para na banda di caminda.

   A sali na cla cu den e auto tin un pareha y nan discusion a yega na un nivel, te cu el a escala y aki partimento di sla a cuminza.  Mesora yamadanan a drenta na Polis di e caso serio aki.

   Nan a splica cu esaki ta socede pafo, diagonal dilanti di Yami Yami Restaurant.

   Un unidad di Polis cu a yega, a bin topa cu e pelea andando keto bay, entre e homber y e dama luchando den e yerbanan cu tin net dilanti e Shopping Center.  Tabatin algun ciudadano cu a trata di stop e pelea.

   Agentenan a mira con e homber bastante agresivo tabata yena e dama cu golpi, y ademas di usa mokete cera, e tabata dal e dama cu elleboog.  Pues e dama no tabatin ningun forma di salba di e golpinan di e homber.

   Polisnan mesora a bay riba e homber, a separ’e di e muher y a mande abao mes ey den e yerbanan.  Mas unidad di Polis a yega pa duna yudansa, como cu e homber keto bay di remate ta buscando tur forma di lanta bek pa sigui bringa cu e dama.

    Pero nan a logra di domina e homber, pone boei na su mannan, y asina elimina e peligro di sigui escala.  Otro agentenan a atende e dama, y aunke e tabatin yen di golpi, el a indica cu e ta “OK”, y no mester di asistencia medico.

   Vehiculo di Transporte a presenta, y a transporta e homber rumbo pa Warda di Polis.  Na e lugar tabata worde papia cu e homber lo ta labora den un Departamento di Husticia.