Partido MEP cu campaña pa yuda yena formulario di Inkomsten Belasting 2021

The content originally appeared on: Diario

Lider di MEP Evelyn Wever-Croes:

ORANJESTAD (AAN): Partido MEP, pa 13 aña consecutivo, ta yuda ciudadanonan di nos pais yena formulario di Inkomsten Belasting 2021 na CEDE di MEP na Santa Cruz. Den e temponan aki, e formularionan lo wordo reparti. E fecha di otorgacion ta 2 di augustus, e ora tin dos luna pa drech’e, yen’e y entreg’e. E fecha ultimo en principio pa entrega ta dia 3 di october.

            Lider di MEP y nos Prome Minister Evelyn Wever-Croes a duna di concoe cu e campaña pa yuda yena e formulario na CEDE di MEP lo cuminsa dia 16 di augustus. Ta bay tin cita pa diamars, diahuebs y diasabra y claro ta bay tin momentonan special pa nos pensionadonan pa nan por bin pasa un rato ameno y wordo yuda sin cu tin cu warda hopi.

            “E fechanan y oranan lo wordo anuncia despues den medio di comuncacion pero di awor caba bo por cuminsa busca bo documentonan pasobra nan ta importante pa bo yena bo formulario corectamente”, Lider di MEP a enfatisa.

            E documentonan cu bo mester ta lo siguiente:

Un comprobante di kico ta bo entrada di trabou, di pensioen etc. Bo por deduci cierto gastonan manera interes riba debenan, prima riba seguro di bida y si bo tin yiunan ta studia den exterior, bo por haya un deduccion adicional. Pa esey bo mester tin un declaracion si cu di fin di aña pasa e tabata bay scol ainda.

            “Pues busca bo documentonan y keda pendiente. Augustus 16, na CEDE di MEP nos ta spera bo pa yuda bo un biaha mas”.