Partido AVP ta denuncia cu prijs di gasolin ta strangulando tur hende

The content originally appeared on: Diario

Sugerencia pa trece “prijs preferencial” pa Autobusnan y Taxi

ORANJESTAD (AAN): Partido AVP a bati alarma awor cu prijs di Gasolin y Diesel a subi bastante.  E ta asina pisa, cu ademas di automobilistanan en general, e ta strangulando tur Autobus y Taxi tambe.

   Prijs di gasoline y diesel a bira mas caro cu nunca antes. E costonan pa e mundo di transportacion y pa e empresanan y famianan a bira practicamente impagabel. Combina cu e aumento halto di costo di bida e circumstanacianan social economico ta birando peor tur dia.

   Segun Partido AVP, e gobierno di Gabinete Wever Croes tin un responsabildad pa cu e aumentonan grandi aki den prijs di gasoline y diesel. door di a redobla e BBO di 3% pa 6% y a kita e descuento di 10 cent pa liter di gasoline y diesel a haci e costo y aumentonan ainda mas severo cu nan ta caba.

   AVP a mustra cu den hopi pais gobiernonan ta asumi un responsabilidad pa crea un alivio cu reduccionan di impuesto pa cu gasoline y diesel. Na Aruba nos no ta mira ningun intencion di Gabinete Wever Croes pa crea un alivio.

   Pesey mes AVP den Parlamento a haci pregunta y duna sugerencia den un carta dirigi na Minister di Transporte y Communicacion y Minister di Finanzas. Eman ta recomenda entre otro papa introduci un prijs preferencial pa esnan den transporte publico.

   AVP a haci tambe e siguiente preguntanan y sugerencia na Minister di transporte y communicacion y Minister di Finanzas:

  (1) Minister(nan) por informa si gobierno ta despuesto pa habri e posibilidad pa esnan cu ta den transporte publico (autobus, taxi y TO) por tuma gasolin/diesel na un prijs preferencial mas favorabel na Arubus ?

  (2) Minister(nan) por informa si gobierno ta despuesto pa kita e BBO of reduci e BBO back na 3% pa gasolin/diesel pa duna un alivio na henter nos comunidad?

  (3) Minister(nan) por informa si gobierno ta despuesto pa pone back e descuento di 10 cent riba accijnzen pa gasolin y diesel pa duna un alivio na nos comunidad?

   Recien fraccion di AVP a bay bishita tambe e mundo di autobus na e Parada di Bus Chikito den Wilhelminastraat.  Despues di a scucha hopi chauffeur di autobus, AVP ta haya cu ta sumamente urgente pa haya un contesta di gobierno riba e preguntanan y sugerencianan cu nan a haci. Pueblo no por mas cu e aumentonan grandi di costo di bida y ainda tin mas medida na caminda.

   AVP ta spera cu lo tin comprension di parti di gobierno cu e situacion dificil aki den comunidad.