Parlamento unanimamente a aproba Ley di Supervisa Gambling

The content originally appeared on: Diario

Organismo nobo ‘Kansspelautoriteit’ a nace! 



Supervision robusto pa tur wega di gambling y number
Parlamentario contento cu lo bay elimina adiccion pa Casino 

ORANJESTAD (AAN): Riba Diabierna, Parlamento di Aruba a sigui cu e tratamento den reunion publico, e tratamento pa cu introduccion di Ley cu ta Supervisa Gambling na Aruba.

   Ta trata di reunion cu ta atende reglanan pa cu e supervision riba prestacion y funcionamento di weganan di suerte y pa bin cu un Organismo di Supervision riba Gambling, cu lo wordo yama “Kansspelautoriteit” pa Aruba.

   Considerando e situacion actual di e menaza di Covid-19, y e intentonan pa mitiga e brote di Coronavirus, Parlamento a tuma decision cu lo tene e reunionnan publico sin presencia di publico.  Solamente miembronan di prensa por a worde admiti.  Teniendo cuenta cu e anuncio di gobierno di dia 5 di augustus 2021 relaciona cu e prevencion di mas contagio cu e virus di Covid-19, ta urgi pa tin tapa boca bisti den e edificio di Parlamento.

   President di Staten, Edgard Vrolijk a habri e reunion y a duna palabra mesora pa Ministro Demisionario di Husticia, mr. Andin Bikker.

   E titular di Husticia a presenta un nota di cambio, cu ta regarda e asunto si acaso lo bay bin un otro Lotto pa Aruba of no.  A dicidi na ‘parkeer’ e tema aki, y cambi’e pa e texto original cu e Proposicion di Ley aki a yega Parlamento cune.

   Bikker a bisa cu e cambio aki, si acaso Parlamento bin di gusto pa saca un ley iniciativa, of si Gobierno nobo trece e atencion pa e tema ey pa bin cu un otro Lotto, esey por wordo atendi den futuro.

   ORGANISMO INDEPENDIENTE: Pero pa awor, e ley pa Supervisa Gambling ta pa Aruba introduci un supervision robusto pa cu tur wega di gambling (bingo y casino).

   Parlamentario Ryçond do Nascimento a enfatiza den su discurso, cu pueblo tin di realiza e importancia di mecanismonan di control den un sociedad cu ta kere den derecho.  Pero tambe ta percura pa e ciudadano cumpli cu leynan, y den e cuadro aki tin e rol specifico pa combati labamento di placa y combati crimen organiza, como cu e ta un atentado contra e estado di derecho mes.

   E ley lo crea un organismo nobo “Kansspelautoriteit”, cu ta independiente y leu for di politica (lesa: Ministro) pa asina no mete den cuestionnan importante.  Toch e por tin un peligro, como cu e ora Parlamentario no tin e control politico, y e hermentnan pa hiba control riba e organismo nobo y independiente aki di Kansspelautoriteit.  Ministro tampoco lo tin herment pa dirigi e Kansspelautoriteit cu ta bay supervisa Gambling.

   Toch tin otro mecanismo di control cu lo bay bira importante, specialmente e rol di Huez Administrativo, y e proteccion di ciudadano cu no ta di acuerdo cu cualkier sancion cu Kansspelautoriteit a duna nan.

   Un consecuencia ta cu Banco Comercial tin tendencia di kibra relacion cu nan tin cu Casinonan, y a mira esaki socede na St. Maarten principalmente, siendo cu un Casino den Caribe cu ta depende di Turismo, ta forma parti di economia y ta importante pa e Casino tin acceso na un banco.

   Pero tin di corda cu Kansspelautoriteit lo no djis atende Casino, pero tambe lo bay pa esnan cu ta bin cu Bingo, esnan cu ta bende Rifa, esnan cu ta bende Lotto, y e Catocheronan cu ta bende number.

   Si Aruba kier un control efectivo riba transaccionnan cu no ta usual, ta necesario pa un persona tin un cuenta di banco.  Pero si Banconan cera e cuenta, e ora envez di yuda e control, bo ta perhudica control di e sistema.  Aki e pregunta ta si acaso e Catocheronan tambe tin cuenta di banco.

   DIFERENCIA DI CASINOWEZEN: Ministro Bikker den su presentacion, a splica cu e diferencia di nucleo di e Kansspelautoriteit compara cu e Casinowezen (DAC) existente, ta grandi.  Di hopi tempo ta conoci cu un di e tareanan di Departamento Asuntonan di Casino (DAC) ta pa preveni cu hungadornan ta bira adicto na gambling, door di controla na porta e nombernan cu ta drenta Casino.  Tambe tin tarea pa duna conseho riba tipo di wega nobo den Casino, y ta duna conseho na Ministro riba peticionnan pa Casino vergunning.

   Pero awor e Kansspelautoriteit ta bin di e necesidad pa Gobierno tin control apropia di e hendenan cu ta explota e permiso di Casino.  Aruba a bay check con e Gaming Board na Curacao ta opera.   Bikker a bisa cu e exigencia pa funcionarionan cuminza traha den Kansspelautoriteit lo bay hopi diferente cu exigencia di esnan cu ta traha na DAC.

   ADICCION DI CASINO:  Parlamentario Endy Croes a pidi Ministro pa mas splicacion riba e proteccion na localnan cu hopi biaha ta sostene Casinonan na Aruba.  Ta apoya nos ciudadanonan di edad grandi cu den nan tempo liber kier bay entretene nan mes na Casino.

   Pero tin di pone atencion riba adiccion di Casino.  Croes a menciona riba un bon amigo di Mike Eman cu semper ta pega riba e lomba di e lider di AVP, esta e locutor Patrick Paskel, y el a ripiti e sumanan di miyones cu e persona ey a cobra di Gobierno anterior, y a agrega cu Paskel ta fanatico number 1 den Casino.  E ta menciona cu e ta spera cu e Kansspelautoriteit nobo aki lo por yuda aun mas profundo pa yuda e hendenan aki cu ta adicto na Casino, y tambe adicto na Placa.

   Na final di e reunion aki, tur Parlamentario a aproba e ley nobo aki, pues Kansspelautoriteit lo bira realidad.