Parlamento mester entrega prueba di madurez na 2024!

The content originally appeared on: Diario

Situacion mundial no ta duna tempo ni oportunidad pa wega

*E impacto negativo di Avestruz sigur mester wordo elimina 

ORANJESTAD(AAN)—Un futuro di cambio ta spera mundo y asina tambe Aruba, cu lo depende di e calidad di trabou cu su miembronan lo entrega pa e beneficionan laboral cu nan ta ricibi.

Na 2024 miembronan di Parlamento mester duna constancia di e realidad, cu politica no ta e trapi pa posicion social personal, pero pa elevacion di bienestar di comunidad, cu ta uza Parlamento como e instrumento central den e Gobernacion di Pueblo, cu democracia ta encera.

Generalmente ora papia di gobernacion, atencion ta bay na miembronan di e cuerpo ehecutivo di gobernacion, cu ta wordo yama Gobierno debi na e hecho cu nan ta encarga cu e labornan diario den funcionamento di e pais.

Si Miembronan di Parlamento tambe a wordo honra cu un salario mensual y otro beneficionan di trahadornan den servicio di Pueblo, ta prueba di e hecho cu Parlamento tin un tarea importante di vigila gobernacion cu ta encarga pues cu e trabaounan directo den funcionamento di e pais.

Pakico mester vigila gobernacion? Pasobra caminda tin hende eror por wordo cometi. Esaki ta haci cu tur cabesante, directiva of personanan cu ta na cabez di organisacionnan, mester tin personanan cu ta revisa loke ta nan ta haci pa por coregi erornan cu por wordo haci.

Na mes momento mester cuminsa actua a base di e berdad, cu gobernacion di e pais no ta depende solamente di e Ministronan den funcion, pero di tur miembro di e aparato gubernamental cu ta e fundeshi pa Ministronan por goberna y pa e sistema democratico por entrega Pueblo e gobernacion necesario pa bienestar di tur miembro den comunidad.

E futuro cu ta spera mundo, no ta nada facil.

Na momento cu ta aplaudi e logronan historico di Aruba den un mundo, cu manera IMF a mustra ayera a sa di sobrevivi e retonan grandi di pandemia, inflacion, guera y mas guera, ta un hecho cu ainda tin retonan enorme ta spera mundo sigur pa motibo di e inseguridad enorme cu ta reina na mundo y cu tambe a bini dilanti den e relato di IMF.

2024 ta bira un aña di importancia total pa e futuro di mundo y di Aruba a base di restructuracionnan cu cambionan di clima y di salida di azeta ta trece pa comunidad.

Decisionnan sumamente importante mester wordo tuma y mester por wordo discuti entre Parlamento, Gobierno y hasta representanan di gremionan y tur instancia oficial na Aruba y hasta den Reino, si ta necesario.

Manera a wordo bisa, ya no tin tempo pa politiconan baha na e nivel di busca piedra den fondo di laman pa ataca otro. No tin tempo mas pa politica produci criminalidad, cu a haci cu Avestruz ta presente den sala di reunion di Representacion oficial di e Pueblo di Aruba.

E situacion mundial ta exigi awor, esfuerso di tur hende pa demostra madurez pa atende cu e retonan grandi cu ta spera den un mundo, cu a keda den tension di guera y desaroyonan cu por afecta e resultadonan positivo di sobrevivencia di 2023.

Awe Aruba ta entrega su Miembronan di Parlamento un reto nobo. E reto di duna prueba cu nan ta representa un Pueblo cu a acepta su Status Aparte na momento cu su economia a basha abou y e mester a sigui cana den futuro.

E gobernacion di Aruba a comberti Aruba den un ehempel gubernamental pa mundo y awe Parlamento di Aruba mester tuma pasonan pa entrega mundo e cara real di Pueblo di Aruba y entre otro sigur mester pasa e Ley cu ta scrap e posibilidad di awe cu Avestruz ta representa Pueblo di Aruba.