Parlamentario ta critica sin cu ta aporta na programa di IPKO, manera Mansur

The content originally appeared on: Diario

Setty Christiaans-Yarzagaray

ORANJESTAD (AAN): Parlamentario di Fraccion di MEP, Setty Christiaans-Yarzagaray a duna un declaracion y a splica e proceso di preparacion pa reunion di IPKO y ta reacciona tambe riba parlamentario Sr. Miguel Mansur.

   El a expresa na prome lugar cu IPKO ta un reunion interparlamentario y ta importante pa comunidad sa con e parlamentarionan ta prepara pa asisti na e reunion aki ya cu por a ricibi cierto reaccion y a sigui entrevistanan durante e simannan cu a pasa di diferente colega den parlamento y di oposicion como tambe ‘feedback’ di comunidad puntrando si ta berdad cu e reunionnan aki a bay asina malo. P’esey ta haya importante pa splica comunidad kico precies IPKO ta. IPKO (Interparlementair Koninkrijksoverleg) ta un reunion entre Parlamentarionan di Corsou, St. Maarten y Aruba hunto cu miembronan di Eerste y Tweede Kamer di Hulanda.

   Di antemano, como miembronan di parlamento, e miembronan di e comision CKABB (Commissie Koninkrijksaangelegenheden en Buitenlandse Betrekkingen) ta reuni pa atende cu puntonan y temanan cu lo kier wordo trata na Hulanda den forma conhunto, como temanan cu ta desea pa wordo poni ariba agenda, a remarca.

   Christiaans-Yarzagaray a sigui bisa cu den diferente ronda di reunion di preparacion pa IPKO tur miembro, tambe di oposicion, ta trece topiconan ariba mesa. Casi tur punto cu a wordo treci dilanti, a wordo poni ariba agenda di IPKO, e parlamentario a remarca. Puntonan manera fondonan di Union Europeo, salud mental (GGZ), calulacion di ‘Armoedegrens’, criminalidad y corupcion y problemanan cu nos studiantenan ta encontra na Hulanda, entre otro.

   A enfatisa riba e echo cu e colega cu a indica cu cos no a bay bon na Hulanda ta Sr. Miguel Mansur. “Mi kier a bisa esaki categoricamente. Si bo kier aporta y papia y critica, participa na e reunionnan di preparacion tambe. Pasobra señor Mansur, bo n’ bin ni un di e reunionnan aki. Bo n’ atende ni un di e reunionnan di preparacion. Bo n’ yega mesora na e reunionnan tampoco, manera reunion di Raad van State prome cu IPKO ni tripartite. Pero bo kier duna un refleho na comunidad cu e reunionnan aki ta bay malo, cu e reunionnan aki, por ta pa bo, n’ tin ningun aporte. Pero bo tey prome den avion si. Pero bo ta e prome cu a bula bay Hulanda si y bo n’ ta atende tur e reunionnan. Bo n’ ta bin prepara”, Christiaans-Yarzagaray a vocifera.

   Mansur no mester critica sin cu a aporta pa yega na solucionnan. “Paso si nos tey como politiconan nobo, simplemente pa critica so, nos n’ ta aporta y nos n’ ta engrandece e calidad di Parlamento ni di nos mes como un simpel ciudadano di nos comunidad”.

   E parlamentario a finalisa bisando cu esey ta e forma con IPKO ta wordo prepara y esaki ta e manera cu Parlamento mester informa pueblo dicon e cosnan aki ta wordo organisa.