Parlamentario Molina hopi contento cu proyecto “Mi mesun heroe” unda 600 mucha a participa

The content originally appeared on: Diario

E gobierno aki si a dune atencion:

ORANJESTAD (AAN) – Den conferencia di prensa di fraccion di MEP, Parlamentario Alvin Molina a elabora riba e tema di “Triangulo di Seguridad”.

“Pa nos traha di berdad y na un manera sostenible riba e seguridad den nos comunidad, e seguridad den nos barionan, nos tin cu inverti den husticia, den e area social y den enseñanza. Pa e tres aspectonan aki por funciona optimal, mester tin colaboracion entre nan”, Parlamentario Molina a splica.

Desde tempo cu el a traha den Cuerpo Policial y te aworaki tambe, e ta bisa cu no solamente cera pariba e hendenan cu ta haci malo no ta bay ta e solucion pa e problema di criminalidad cu tin na Aruba. El a bisa cu esaki ta mescos cu carga awa pa lama.

“Nos tin cu frena e criminalidad na su origen y esey ta den nos barionan. Esey ta rekeri, un biaha mas, di esfuerzo di e tres areanan menciona.

Muchanan cu ta ricibi un bon educacion tin un chens mas grandi di un futuro laboral exitoso, y menos chens di bay den mal caminda. Famianan saludable, cu tin cuminda riba mesa, cu ta bibando den un bario cu yen di actividad positivo, tin mas chens pa nan yuda, pa nan aporta y eleva e desaroyo den comunidad. Hacie mas sigur”, Molina a subraya.

El a sigui splica cu un aparato hudicial efectivo, eventualmente lo aporta na preveni cu hendenan lo comete actonan penal. “Cu otro palabra, atrobe: prevencion, prevencion, prevencion den tur tres area”.

E parlamentario ta lamenta cu aki na Aruba, abuso di mucha ta algo real. “Y nos por discuti si e situacion ta alarmante, si e situacion aki na Aruba ta birando miho, si e ta birando peor, nos por discuti hasta si gobiernonan ta haciendo suficiente, pa stop e fenomeno repugnante aki. Pero sigur, loke nos ta di acuerdo cune, ta cu cada un caso, ta un caso di mas”, parlamentario Molina a acentua.

El a expresa cu e ta hopi contento cu gobierno, y specialmente señora Edselyn Figaroa hunto cu su ekipo y e muchanan cu su team, e luna pasa a presenta e proyecto “Mi mesun heroe”. Molina a señala cu Figaroa tin diez aña ta cana cu e idea aki, 16 biaha el a presente na diferente mandatario pero e aña aki si, el a haya oido pa e tremendo proyecto aki, no solamente bunita pero necesario”, Molina a remarca.

El a agrega cu señora Figaroa a haya oido den e bureau di Minister di Husticia y Asunto Social,  señor Rocco Tjon. El a expresa cu solamente nos por imagina cu 600 mucha a yuda den e proyecto aki, cu a participa den e video. “Esey kiermen cu ya caba tin 600 mucha cu ta miho ekipa, educa y motiva pa evita un abuso di mucha, cu e no sosode mes”, e parlamentario a señala.

Molina a gusta e manera con e proyecto aki a wordo treci dilanti, y ta obvio cu e ta wordo capta door di e muchanan y cu nan lo ehecuta locual nan a siña. E proyecto y ta traha preventivo door di e muchanan mes, cu nan ta prepara pa evita pa algo pasa door di nan actitud y cu nan ta empodera. Pero nan ta causa tambe cu un posible abusador, lo pens’e hopi mas biaha prome cu ataca un mucha.