Pareha turista a haya idea na Aruba pa nan tambe habri un refugio pa buriconan na Merca

The content originally appeared on: Diario

Taxista Arubiano a duna nan idea pa e nomber…

ORANJESTAD (AAN): Nan a yega Aruba pa prome biaha riba nan Luna de Miel. E dama Heidi Latka y su casa a bin pa goza di tur e bunita awa, fabuloso beach, y tambe admira naturaleza di Aruba.

   Ora cu nan tabata na Aruba, nan a tende di e Sanctuario di Burico na Santa Lucia, y a dicidi na tuma un Taxi y a bay rumbo pa eynan pa mira e animalnan aki di cerca.

   E momento cu nan a drenta e Sanctuario, nan a keda encanta cu e trabao di e voluntarionan, y di esnan cu ta na cabez di e lugar di refugio aki.

   E pareha a keda asina impresiona cu e Sanctuario di Burico na Aruba, y pesey ora cu nan a regresa Merca bek, nan a dicidi na habri algo asina cu ta specializa den un animal specifico.

   Di e forma ey, na aña 2020, e dama Heidi Latka a funda y bira e director di un lugar special di refugio na pueblo di Bethlehem na estado di Connecticut.

   “The Donkey Cross” ta un sanctuario sin fin di lucro, situa na Shagbark Hollow Farm na pueblo di Bethlehem.

   Tur caminda bo ta haya lugarnan di refugio cu ta specializa den djis animalnan equino, pero esun aki di Heidi ta e unico cu ta local y 100% enfoca riba buriconan.

   Un relato publica e siman aki pa e canal di WFSB-TV na Connecticut, a pone spotlight riba e sanctuario di burico aki, y a inclui nan storia con nan a haya e idea aki ora di a bishita e Sanctuario di Burico na Aruba.

   Con nan a bin cu e nomber di ‘The Donkey Cross’?  Nan a splica cu ora nan a tuma un Taxi pa move di nan Hotel pa e Sanctuario di Burico, e Taxista a conta nan un storia chikito di Bijbel di e ‘donkey cross’, y e pareha Mericano a bisa cu esaki ta ideal pa nan nomber di pueblo di Bethlehem.

   Awor e buriconan cu ta na ‘The Donkey Cross’, tur ta procedente di Connecticut.  Nan ta tuma e animalnan ora cu e doñonan no kier nan mas, nan ta traha cu oficialnan local di Animal Control, y nan tin un residente na e sanctuario cu ta eynan semper.

   Cada biaha cu nan haya un burico nobo, nan ta pone nan potret riba nan website y Facebook pa asina publico por mira cual di nan por wordo adopta.

   Y constantemente nan ta haya bishita di hendenan cu kier bin mira e buriconan aki, cu ta hopi amistoso cu tur hende, specialmente mucha.  Tur ganashi cu nan haci eynan, ta beneficia e sanctuario.  Bo por check nan tambe na e website:

thedonkeycross.org

   Den dos aña di tempo, ya caba tur stal na e boerderij aki ta yen, y pesey ta recaudando fondo pa bin cu extra stal pasobra cada rato ta hayando mas burico acerca.