Panorama mundial ta anima criminalidad

The content originally appeared on: Diario

Recuperacion di Aruba ta progresa den turbulencia mundial — *Aumento di costo di bida den situacionnan sin perspectiva — *Resultado crisis riba crisis ta inseguridad y caos social mundial

ORANJESTAD(AAN)- “Uno di e asuntonan mas importante cu tur lider na mundo awor mester atende, ta e resultado cu crisis tras crisis tin pa hende y finalmente pa criminalidad.”

   For di momento cu instancianan manera Fondo Monetario Internacional y World Bank a anuncia aumento enorme di costo di bida, DIARIO a sigui e resultado cu esaki lo tin pa comunidadnan na mundo.

   Kico lo pasa cu planeta tera den un crisis tras di crisis? Pregunta cu tabata base di investigacion cu DIARIO ta sigui haci y cu durante ultimo simanan a splica kico por spera di economia mundial y cuanto placa hende lo mester pa come den un situacion cu ta exigi austeridad severo.

   Informacionnan mundial ta keda insistente y ta mustra cu mester sigui tene consideracion cu e hecho cu prijs di cuminda lo subi dramaticamente cu mas cu 30 porciento.

   Manera a bini dilanti, economia lo wordo afecta mescos cu entrada di paisnan cu ta depende di economia.

   Importante den un democracia ta, kico finalmente e pronosticonan lo nifica pa e hende y con hende lo trata na adapta su mes na e situacion nobo.

   “Hende mester ahusta su gastonan sin mas,” expertonan ta mustra. Nan ta indica cu ora papia di un aumento di por lo menos 30 porciento di prijs di cuminda mundialmente, ta papia di e hecho cu loke ta un Florin ta bira 30 cent mas caro.

“Si bo tabata gasta Un Florin, awor mester di Trinta Cent mas,” a bini dilanti. Esaki ta e realidad.

No ta prijs di cuminda so a bira mas caro mientras den e proceso di “crisis riba crisis”, cu a cuminsa pa mundo na 2020 ora economia mundial a cay completamente y na Aruba haci cu ningun hende por a bay traha.

“Na Aruba Gobierno por a duna y te awe ta duna asistencia pa personanan sin entrada. Pero tin hopi pais na mundo y den e region directo di Aruba, cu a cay den pobresa absoluto,” a bini dilanti.

E expertonan a mustra cu na Aruba tambe por papia di un caida di entrada ya cu hopi salario a baha na Aruba.

E situacion mundial ta wordo marca pa falta di placa. Loke paisnan y hende a kere cu e lo tin na entrada prome cu 2020, no a bira realidad. Mester biba cu mucho menos, loke por crea situacionnan serio.

Uno di e factornan cu mester tene na consideracion ta, cu aumento di pobresa ta aumento di crimen tanto local pero tambe importa.

“Nos ta biba den un epoca cu ta fomenta e posibilidad pa haya entrada for di loke ta ilegal,” a wordo trece dilanti.

Criminalidad ta aumenta den problemanan social cu ta un hecho ora mundo, paisnan y hende no tin placa pa gasta manera tabata costumber y sigur ora prijsnan ta subi.

Negoshi di droga. Negoshi den arma. Negoshi ilegal ta haya espacio pa aumenta den un comunidad cu problema social conoci of scondi.

Crisis riba crisis tin tambe un efecto riba hende, cu ta cansa di situacionnan dificil cu ta presenta y cu no ta duna perspectiva.

Rond mundo mas hende kier biaha. “Subi avion y biaha pa otro parti di mundo ta aumenta turismo pero tambe a expresion den hopi caso cu hende tin urgencia pa bandona su realidad di tur dia, tension y cansancio mental,”un informante experto ta splica.

E problema ta cu e “crisis riba crisis” no ta duna indicacion cu e ta termina. E interdependencia di paisnan ta hunga un papel.

E ambiente mundial ta dificil loke ta nifica tension sin placa pa busca recreo den un mundo exigente.

“Caida den entrada; debe cu no por wordo paga; productonan cu a bira mas caro; tension mundial, ta crea e situacionnan den cual criminalidad ta propaga.

Aruba sigur mester pone atencion na e realidad cu su nivel social ta mas halto cu hopi pais den su region. E ta atractivo asina pa negoshi ilegal y criminalidad serio cu ta conecta directamente na acto contra ley.

Importacion scondi ta porta pa criminalidad, cu ta percura pa entrada di loke ta prohibi manera droga y arma.

“Exigencia sumamente pisa ta mara na gobernacion na tur parti di mundo den e crisisnan actual,” a wordo indica na DIARIO cu a wordo presenta cu e economia alternativa cu ta crea su mes den tempo di guera y crisis social.