“Pa rescata e fondo di AZV Aruba mester di nos tur”

The content originally appeared on: Diario

ORANJESTAD (AAN) – Pa cera e reunion publico den Parlamento, relaciona cu AZV y con pa rescata e fondo, Minister Presidente mr. Evelyn Wever-Croes, dirigiendo su mes na Presidente di Staten mr. Edgard Vrolijk,


a expresa cu e ta kere cu mayoria di Parlamentarionan a contesta e pregunta si nan kier keda cu AZV manera e rolls Royce cu ta costa 250 miyon florin cu gobierno no por carga, of kier cambi’e pa un modelo mas largo y mas factible.

“Esey ta duna mi un sentimento di trankilidad pa mi sigui busca e miho solucionnan pa e retonan grandi cu tin den nos pais. Mi ta gradici Parlamento pa tin e interes di rescata e fondo; mi ta gradici minister Dangui Oduber, apesar cu e persona cu yame akiden y a haci masha beheid mes, cu ta Marisol Lopez-Tromp cu ni a aparece den Sala di Parlamento, ni sikiera a duna un motibo; pero e minister a bin y a contesta tur pregunta di e mesun manera, y esey ta algo cu mi ta gradici’e”, Minister Presidente a menciona.

Tambe el a gradici e profesionalnan cu tabata tey pa sostene e Minister, y e ta gradici SVb tambe pa tur esfuerzonan cu ta wordo haci.

“Na e momentonan aki nos ta enfrentando hopi reto. Nos ta enfrentando retonan hopi serio. Na e momentonan aki na Aruba tin hopi necesidad y no tin hopi recurso. Ora bo tin hopi necesidad y no tin hopi recurso, bo retonan ta hopi dificil. Mi ta haci un comparacion pa mustra cu tur cos ta posible, apesar di con dificil e ta, Señor Presidente, abo como tata ami como mama, abuelo, abuela, nos sa cu tin biaha nos tin cu tuma decisionnan dificil den bienestar di nos yiunan,  of nos nietonan. Tal vez esey ta den nos DNA: tuma e decisionnan dificil na tempo, na un forma responsable, na bienestar di nos yiunan. Awe, berdad, si nos tur kier rescata AZV, e ta tuma esfuerzo di nos tur hunto; gobierno no por hacie su so. Parlamento tambe mester duna di su parti, comunidad henter mester duna di su parti, y tambe sector publico, sector priva, NGO’s, Academico: tur sector di nos comunidad! Na e momentonan aki  mas cu nunca pa rescata e fondo di AZV, Aruba tin mester di nos tur”,  e dignatario a conclui.