Pa prome biaha Prome Minister di Aruba presente pa saluda studiantenan cu a yega Hulanda

The content originally appeared on: Diario

ORANJESTAD (AAN): Cu vuelo KL-765 di KLM a yega Diamars 2 di augustus un cantidad di 90 studiante Arubano pa sigui un estudio avansa na nivel di HBO of Universidad na Hulanda.

   Esaki ta e prome vuelo cu studiante cu ta yega Hulanda. Ta trata aki di studiantenan cu ta bay studia na Rotterdam, Arnhem, Nijmegen, Wageningen, Enschede, Deventer, Zwolle, Groningen, Leeuwarden, Eindhoven y Maastricht.

   Na Schiphol e studiantenan pa prome biaha a worde saluda pa Prome Minister mr. Evelyn Wever-Croes. Tambe Minister Plenipotenciario Suplente mr. Ady Thijsen y directora a.i. di Arubahuis drs. Glenda Hernandez a yama e studiantenan bon bini. Un delegacion consistiendo di functionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) presente den sala di yegada di Schiphol.

   Despues di casi un ora y mei cu e avion a baha e studiantenan por a piki nan maleta y a sali pafor di e sala di yegada. Akinan na un forma bon coordina y organiza a haya instruccion di personal di Arubahuis, mentornan y miembronan di e POC unda nan mester a para den grupo pa warda nan turno pa bay na e bus cu lo hiba nan na nan ciudad di estudio.

   Awe e grupo aki di studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.

   E prome aña e studiantenan ta ricibi guia di e studiementor, pero pa e resto di su estudio e ta cay bao di Arubahuis.  E potretnan ta cortesia di Arubahuis.