Pa IPA ta  hopi importante ta parti di e organizacion di e Conferencia “Enseñanza, nos responsabilidad”

The content originally appeared on: Diario

Marilyn Richardson ta relata di con:

ORANJESTAD (AAN) – Marilyn Richardson,  di parti di IPA, a declara den e rueda di prensa cu, como Instituto Pedagogico Arubano nan ta haya hopi importante pa forma parti di e organizacion di e Conferencia “Enseñanza, nos responsabilidad”.

Esaki mirando cu IPA tin e tarea di educa e maestronan y docentenan, pero tambe un tarea hopi grandi riba tereno di profesionalizacion di e educadornan na Aruba.

“Durante e Conferencia aki nos ta bay enfoca hopi mas riba e parti di nos trabao, cu ta un trabao hopi importante. Tur educador a haya un educacion na un nivel superior riba HBO of hasta mas halto. Pero bo por puntra bo mes si esey ta suficiente, pa bida largo. Si un bez bo a haya e diploma ey, bo ta cla haciendo bo trabao sin mas”, Richardson a señala.

El a subraya cu e educador, mescos cu un ciruhano, mester sigui profesionaliza su mes den nan area di specializacion, pa tene cuenta cu tur e cambionan cu mundo ta bin cune.

“Como educador bo ta den e ‘business of learning” anto e meta principal di bo trabao ta pa eigenlijk zorg cu bo ta produci sernan bon prepara, talentoso, cu ta cla pa asumi e retonan den nan bida, den e mundo aki”, señora Richardson a expresa.

Un aspecto hopi importante di esaki ta, cu conhuntamente e docente ta stimula e studiante pa sigui desaroya su mes, pa sigui crece den su conocemento, su habilidadnan pero tambe den su talentonan.

“Awor, bo no por logra esaki si bo como educador ‘no ta make it your business pa ta un life long learner’. Den bo profesion como educador, hopi biaha ta wordo eherce pa bida largo. Esaki ta nifica cu, como maestro, bo lo topa varios generacion durante di bo trabao”, el a splica.

El a agrega cu cada un di e studiantenan aki ta diferente, tin nan propio talentonan, nan forma di inteligencia y nan forma di siña. Anto, loke ta importante ta cu loke ta funciona cerca un alumno no ta funciona cerca e otro y e docente mester diferencia y wak con ta acopla na e studiante ey.

Richardson a acentua cu por conclui anto cu e enseñanza di pasado no ta funciona, aworaki, mas.

El a reitera cu, como educador “abo mester percura cu bo ta make it your business pa sa e necesidadnan di cada alumno cu bo tin bo dilanti”.

Asina e educador por acopla na e necesidadnan cu cada studiante tin, pa awendia nan ta bon ekipa cu tur e habilidadnan di siglo XXI; cu nan ta bon prepara pa un bida largo como ciudadano di mundo, cu nan ta bon conecta cu nan bida social, y vooral historico y ecologico. “Na IPA nos tin un centro cu ta dedica tempo na e profesionalizacion. E ta yama ‘Centro pa Desaroyo Profesional Continuo’, (CDPC). E meta ta nos tin un desaroyo optimal na cada scol y den henter e comunidad educativo, pa asina cada alumno y studiante Arubano, por ricibi enseñanza di calidad halto; cu nan ta motiva y stimula pa desaroya nan talentonan y prepara nan pa bida. Siña nan traha na Siglo XXI”, señora Marilyn Richardson a conclui.