Pa dia rond di 10 hende cu cita no ta presenta pa keur nan auto

The content originally appeared on: Diario

ORANJESTAD(AAN): Durante un entrevista cu DIARIO, Francis Quandt hefe di Departamento di Keur na DTI a splica cu actualmente ta hopi slow pa loke ta e cantidad di hende cu ta bin keur nan auto.

“Di e lista di cliente cu tin cita bin keur nan auto, pa dia tin alrededor di 10 cu no ta presenta”.

Nan como cliente ta faya, pasobra nan ta paga pa keur nan auto y si nan no bin riba e dia stipula nan ta perde nan placa, segun Quandt.

El a splica cu despues cu riba 3 dia polis a tene control di trafico, varios hende a bay traha cita na DTI, pero despues di algun tempo cos a bira slow atrobe.

Segun Quandt, ora bo traha bo cita na DTI bo tin cu bin keur bo auto dentro di 7 dia.

Si riba e dia cu bo tin e cita bo no bin bo ta perde bo cita.

Ora cu un persona por ehempel ta malo y no por bay keur su auto, e por yama DTI pa cambia su cita, segun e hefe di departamento di keur.

DIARIO  a puntra Quandt cua ta mas tanto e parti riba cual ta keur af auto y el a splica cu esaki ta mas tanto brakes y luz.

Si e auto wordo afgekeurd, e cliente ta haya 30 dia pa drecha locual mester wordo drecha.