‘Oog Poli’ ta atendiendo 600 pashent pa siman

The content originally appeared on: Diario

ImSan a celebra Siman di ‘World Sight Day’

ORANJESTAD (AAN) – Ruthmila Odor, Manager di Instituto Medico San Nicolas ‘ImSan’ a duna DIARIO informacion tocante e siman di ‘World Sight Day’ cu ImSan ta den celebracion.

Ruthmila a señala cu tempo di Covid-19 ‘Oog Poli’ a muda y nan a yega den nan localidad nobo, y nan tin hopi servicio nobo cu ni e trahadornan di ImSan a haya chens di conoce kico tur nan ta haci den e clinica di wowo.

            Odor a splica cu danki na e director di ImSan, docter Rajnherc, nan ta celebra y concientiza dunando charlanan y a tene un ‘opendag’, unda cada parti di e clinica di wowo a prepara nan huki unda nan ta traha pa conta e trahadornan di ImSan kico tur nan ta haci diariamente, pa nan pashent.

            “Tene cuenta cu Oog Poli ta haya semanalmente 600 persona. Tin e pashent cu ta bin pa consulta, ta haya preparacion pa wak e vision di wowo, y a base di esey, e ta bay na e docter. E docter ta pidi un scan of un echo, y tin asina hopi mashin cu e docter por wak detaya kico ta e miho cuido pa e pashent”, Ruthmila Odor, a menciona.

            El a agrega cu hopi biaha ta resulta cu e pashent toch, tin cu haya un tratamento por ta di laser, di angua den wowo, cu gotanan of tratamento ya mas avanza, cu mester opera. “Masha poco nos tin cu manda pashent afo, awendia” Odor a subraya, agregando cu Aruba ta hopi avanza den tratamento di wowo.

            “E fastioso ta cu despues di Covid-19 tabata hopi dificil, vooral pa docter di wowo, pasobra nos ta yega asina cerca di e pashentnan, cu pa atende e cantidad di pashentnan cu normalmente nos ta atende, poco poco nos ta hal’e  in. Nos ta haci na ImSan, di dialuna pa diabierna, operacion di wowo”, Ruthmila Odor a remarca.

E lista di spera ta hopi largo, a subraya.

            “Dr. Lacle, recientemente, a papia cu HAVA anto tin ideanan cu mi ta kere cu ta hopi bon, cu aworaki ta cuestion di concretiza pa nos por haci e flow pa e pashentnan pasa den un filter y di eynan yega na Oog Poli, vooral e problema cronico di Diabetes”, Odor a comenta, indicando cu tratamento di angua den wowo cu tabata wordo haci na Corsow, mescos cu tratamentonan di glaucoma, retina, catarata etc., tur ta wordo haci na Aruba, y e ta orguyoso cu pashentnan den e region tambe ta wordo manda Aruba.

            Finalmente Ruthmila Odor, Gerente di ImSan, a bisa cu e clinica di wowo ta consisti di como 25 trahador, pues e ta un departamento grandi, y nan tin un sucursal na Stadionweg.