Ómicron ta pone e cadena di suministro den riesgo atrobe

The content originally appeared on: Diario

ORANJESTAD (AAN):  Parce cu awor cu a kere cu e crisis den e cadena di suministro na nivel mundial tabata cuminsa estabiliza, awor cu e aparicion di e variante Omicron, e situacion ta cambia poco poco.


Tin informacion cu e manera con algun lider mundial ta atendiendo cu a aparicion di e variante Omicron ta poniendo e trahadornan den mundo di transporte e cadena di suministro global den mayor riesgo di colapse. Asina e adverti e organisacionnan internacional di transporte y e sindicatonan cu ta representa e transporte terestre, aereo y maritimo.

E trahadornan aki mester por continua cu nan trabao y crusa e fronteranan sin reglanan di viahe demasiado restrictivo, pa por mantene e movimento di e cadenanan di suministro cu ya caba a wordo afecta.

Por menciona entre otro e Asociacion Internacional di Transporte Aereo (IATA), e Camara Naval Internacional (ICS), Unión Internacional di Transporte pa Caretera (IRU) y e Federacion Internacional di Trahadornan di Transporte (ITF), cu a pidi conhuntamente na e gobiernonan pa no bolbe impone restriccionnan fronterizo cu ta limita mas e libertad di movimento di e trahadornan di transporte internacional y siña di e lesnan di e ultimo dos añanan.

For di e momento cu Organizacion Mundial di Salud (OMS/WHO) a confirma e variante nobo di Covid-19, Ómicron, como un “variante di preocupacion”, rond di 56 pais a bolbe impone diverso gradonan di restriccion di viahe.

E organisacionnan di transporte cu ta representa mas di 20,000 miyon dolar di comercio mundial anualmente y 65 miyon trahador di transporte mundial den henter e cadena di suministro, ta pidi pa pone fin na e enfoke pa loke ta e reglanan di viahe di e gobiernonan.

E organismonan di transporte tambe a expresa nan frustracion pasobra e gobiernonan ta incumpliendo e pasonan cla emiti na e lidernan mundial na september pa garantiza e circulacion liber y sigur di e trahadornan di transporte.

Nan ta pidi tambe pa duna prioridad na e trahadornan di transporte pa ricibi vacunanan reconoci pa OMS/WHO; adopta protocolnan duradero di viahe y salud desaroya door di e industria pa esnan den sector maritimo, e chauffeurnan y e tripulacion aereo, cu e respaldo di Organisacion Mundial di Salud, Organisacion Internacional di Trabao, Organisacion Maritimo Internacional y Organisacion di Aviacion Civil Internacional.

Otro peticion ta pa crea certificadonan y procesonan di vacunacion armoniza na nivel mundial, digital y mutuamente reconoci pa demostra constancianan di salud (inclui e estado di vacunacion y e resultadonan di e test di COVID-19), cu ta fundamental pa garantiza cu e trahadornan di transporte por cruza e fronteranan internacional.