Oficina di Interpol na Aruba a lanza sistema ‘Interpol aan de Grens’

The content originally appeared on: Diario

Sistema na aeropuerto awor ta conecta cu data base internacional di Interpol


ORANJESTAD (AAN): Dialuna atardi na Nationaal Centraal bureau Terrorismebestrijding Veiligheid en Interpol (NCTVI), mihor conoci como e oficina di Interpol na Aruba, a tuma lugar un rueda di prensa, tocante lanzamento di un sistema nobo, cu ta yuda detecta posibel criminalnan busca pa Interpol ora cu nan drenta of sali for di Aruba.

Despues di un video cortico riba e sistema aki, minister di Husticia Rocco Tjon a hiba palabra y a bisa cu tabata un dia di hopi satisfaccion, mirando e logro aki di NCTVI.

“Cu e proyecto aki practicamente dos punto pa loke ta e maneho di nos ministerio ta bin hunto, esta eleva seguridad na nos frontera y na mes momento via inteligencia y informacion”.

Mi ta kere cu esaki ta locual ta necesario aworaki tambe, minister Tjon a bisa.

E mandatario a indica cu NCTVI ta un departamento hopi hoben cu na 2018 a wordo instala.

El a sigui bisa cu e trabaonan cu e departamento aki a bin ta desplega caba ta grandi, specialmente pa seguridad na Aruba.

E sistema nobo cu yama ‘Interpol aan de Grens’ y segun e mandatario esaki ta un di e proyectonan unda cu e sistema conoci manera Radex ta wordo acopla na tur e data bases di Interpol.

“Esaki nifica cu ora cu personanan bin Aruba y ta wordo busca internacionalmente, e sistema ta señal esaki y ta duna un asina yama ‘hit’”.

Asina nos por preveni cu nan ta drenta Aruba pa haci cualkier maldad.

Esaki no ta solamente un sistema, pero den practica tambe tin un oficina aworaki na Aeropuerto, caminda cu tin personal di Interpol y di e forma ey no solamente bo ta percura pa e sistema por funciona bon, pero bo ta percura tambe pa e colaboracion entre e diferente departamentonan cu tin un responsabilidad pa garantiza seguridad na nos frontera, por wordo ehecuta na mihor forma, segun Tjon.

El a splica cu e intencion awor ta pa bay traha via un maneho nacional pa loke ta informacion y inteligencia.

Esaki ta un di e proyectonan cu ta pas den e maneho aki.

E minister a indica cu tin mas proyectonan cu Interpol lo bin cune pa garantiza entre otro seguridad pa locual ta e armanan cu ta drenta y circula na Aruba.

“Atravez di un sistema yama ‘I-Arms’  NCTVI tambe lo por percura pa compartimento di informacion entre tur departamento ta mas mihor”.

E bin di esaki ta cu e ora ey bo ta haya mihor bista riba e rednan.

Di e forma ey nos lo bay por combati criminalidad mucho mas mihor, segun e mandatario.

Tjon a sigui bisa cu siman pasa a wordo anuncia caba cu fin di November ta bay lanza e proyecto piloto  pa loke ta e mobile app pa cuerpo policial, cu tambe ta pas den e cuadro ey.

El a splica cu si tur cos bay bon, na 2022 lo lanza tambe e proyecto piloto pa e asina yama Mobile Data Terminal, pa asina informacion y inteligencia ta mas accesible pa tur esnan cu ta traha di berdad pa eleva seguridad na Aruba.