“Nos Habitantenan a duna testimonio awor mester di decision y accion”

The content originally appeared on: Diario

Stichting Parkietenbos na Gobierno y Miembronan di Parlamento:

ORANJESTAD (AAN): Riba Diadomingo un biaha mas holo malo a afecta e barionan di Mahuma, Parkietenbos, Buena Vista, Simeon Antonio y Bucutiweg. Hasta te na Aeropuerto y Hotel Hyatt Place e holo malo cu ta bin di e dump di Parkietenbos, di Barcadera y di Ser’i Teishi a yega.

   Recientemente Stichting Parkietenbos y varios ciudadano di e barionan, entre nan varios adulto mayor a duna testimonio na esnan di Oficina di Maneho di Crisis (CMO) tocante di e sufrimento cu e habitantenan ta pasando aden. A worde splica na tur e miembronan di e Oficina di Crisis y e expertonan y hefenan di departamento presente cu e rosea di e habitantenan di e barionan a worde comprometi y esaki ta un violacion di derechonan humano segun World Health Organization.

   E habitantenan a perde e derecho di hala rosea di aire limpi pa motibo cu for di diferente direccion tur dia, aire cu holo malo ta drenta e barionan. Mainta trempan cu e biento di pariba e holor di e desperdicio dera bao di tera na Ser’i Teishi ta yega den e barionan, esaki ta duna e habitantenan, stress, dolor di cabes, alergia y molester di wowo. No ta tur dia e aire ta hole mesun fuerte, sinembargo e gasnan di desperdicio cu ta putri bao di suelo, varios di nan no ta hole pero si por ta toxico.

   Riba Diadomingo, un biaha mas biento a cay y despues a bira, treciendo e holo malo di e dump di Parkietenbos den cas di e habitantenan. Pues na sea cual sea e direccion di biento, e habitanan ta worde molestia cu aire contamina.    Awor bisiñanan a descubri tambe con serio y grandi e contaminacion di lama y e tera di lagoen di Bucuti ta. Tin muchanan cu a bay cana canto di lagoen y a trapa den santo cu enbes di blanco of bruin a bira preto y azeta a sali. Expertonan local a informa Stichting Parkietenbos cu e lagoen mester worde sanea sino e ta sigui contamina e areanan mas pabao di nos costa y lama.

   Mester contene e contaminacion por medio di sanea e causa y esey ta e dump di Parkietenbos mes. Stichting Parkietenbos a urgi gobierno pa ataka e desastre ambiental aki cu un plan total, un instancia cu reputacion y experticio, preferibel di Hulanda of Merca, lo mester haci un estudio profundo y rapido pa detene e contaminacion den e lagoen, sanea e dump di Parkietenbos y para e deramento di desperdicio cu ta tumando lugar na Ser’i Teishi.

   Gobierno y Parlamento mester concentra na aloca e fondonan necesario urgentemente pa remedia e situacion actual y pa traha riba un solucion total y duradero, sin cu un pueblo tin cu bira victima di practicanan di dera desperdicio cu no ta sostenibel ni saludabel. E habitantenan kier hala rosea di aire limpi atrobe, manera tabata antes y pa sanea nan lagoen cu semper nan a landa y pisca.