Normanan di Aruba pa salario di ehecutivonan

The content originally appeared on: Diario

Tamaño y entrada di un pais ta decisivo den gasto di personal — Realidad financiero no ta permiti extravaganza compania di Gobierno — Prijs di companianan di Gobierno mester ta alcansabel pa Aruba

ORANJESTAD (AAN) – Tin cierto realidad di bida cu hende mester acepta. Tanto den servicio di Gobierno como na companianan di Gobierno, salarionan cu ta wordo paga y gastonan cu ta wordo haci, mester ta di acuerdo cu e placa cu Pueblo tin na su disposicion.

Pueblo di un pais no por hinca su mes den un situacion cu e no tin placa pa cubri. E cifranan pa gasto di cada pueblo ta diferente.

Na e momento cu Aruba dicidi cuanto placa e ta bay gasta na expertonan pa traha pa Aruba, e no por pidi un pais grandi manera Hulanda ni un isla manera Puerto Rico bisa cuanto placa nan ta paga na ehecutivonan pa asina Aruba dicidi kico Aruba ta paga.

Esaki ta e prome motibo pues, cu no mester cuminsa cu e cancion di costumber cu Aruba mester paga salarionan sumamente halto pa asina Aruba garantisa cu e tin expertonan capacita den su servicio.

E expertonan cu Aruba por atrae, ta bon na haltura cu nan lo traha pa un pais cu cierto entrada.

Na Aruba por ofrece salarionan cu ta mas abou cu paisnan mas grandi pero na mes momento ta ofrece un responsabilidad ehecutivo mucho mas chikito.

Un experto cu por bati tanto na porta di Aruba como na un compania grandi den exterior, ta bon na haltura cu e responsabilidad cu e lo carga na Aruba ta completamente diferente for di e tarea cu ta spera na un pais grandi.

Esaki ta e gran berdad. Ademas mester tene na consideracion, cu paisnan mas grandi cu entrada mas grandi cu ta haci salarionan mas halto posible, conoce structura di ehecutivo y personal diferente.

Pues no mester cuminsa cu e storia cu calidad di trabou y produccion di e gerente ta bay atras pasobra e no ta gana un salario cu Aruba no por paga.

Un experto cualifica sigur ta un persona cu no ta bay presta su mes pa exigi placa cu e compania cu e mester dirigi no por paga a menos cu subi prijs pa un comunidad cu ya tin problema serio pa cubri gastonan existente.

Den buskeda, atraccion y nombramento di expertonan, sigur den e situacion mundial actual, ta parti for di e punto di bista cu Aruba ta busca hende integro pa haci e trabou cu mester wordo haci.

Na cada pais e funcionamento di un experto ta diferente, pero base ta keda cu integridad profesional hamas por wordo pone na duda.

Na e momentonan aki Aruba no tin 40 pa 50 Miyon pa luna pa paga un dirigente di un compania di Gobierno.

Di otro banda Aruba ta ofrece un ambiente di trabou agradabel den cual e desaroyo propio y participacion di experto por contene un pakete agradabel, retonan nobo y tur loke ta parti di trabou di un ehecutivo cu miras pa alcansa logronan grandi pa e compania y cu beneficio pa su propio Curriculum Vitae.