“No tin ningun rij pa stroba bo pa paga si haci uso di online banking”

The content originally appeared on: Diario

Luenne Gomez-Pieters, directora DIMP:

ORANJESTAD (AAN) – DIMP a haya dos trahado extra pa e departamento cu ta otorga e comprobante di pago, pa e temporada aki so, pasobra segun e contribuyentenan ta paga online, nan ta haci nan peticion pa comprobante di pago. Asina Luenne Gomez-Pieters, directora di Departamento di Impuesto a menciona den entrevista cu DIARIO. El a agrega cu e mes a paga su impuesto di plachi number online, un par di siman pasa, y te ainda e ta wardando su comprobante.

E comprobante ta yega su destinacion, pero e pago ta importante pa haci na tempo, Gomes-Pieters a señala.

Tin un app unda tambe por mustra cu e contribuyente a paga y e por down load esaki como prueba cu su vehiculo di motor ta paga. Y si polis ta para un automobilista nan tambe tin informacion cu nan ta haya regularmente di DIMP.

E number di auto no ta bay aparece riba e lista di KPA pa incumplimento, pasobra e pago ta den e sistema di impuesto. “E pago ta registra y ta pasa riba nos sistemanan di pago y e no ta aparece riba lista di KPA”, Gomes-Pieters a reitera.

El a menciona cu nan a cuminza wak, for di dia 29 di Januari, cu e contribuyentenan a baha bek den gran cantidad pa cumpli cu pago di plachi number, y DIMP ta contento cu esey, pues nan a cuminza mira cu e fecha final ta na caminda, y ta premira cu e rijnan ta bay keda largo te e fecha final, y DIMP ta pidi pasenshi na cada contribuyente cu ta opta pa bin para den rij. Pa nan carga pasenshi cu nan mes, cu nos trahadornan cu ta dunando e servicio optimal cu nan ta desea. Pero si bo kier evita para den rij, bo por paga online for di bo mesun cas, den e comodidad di bo oficina, no tin ningun rij cu ta stroba bo pa paga si bo haci uso di online banking”, directora di DIMP, Luenne Gomes- Pieters a remarca.

El a agrega cu hopi contribuyente ta bisa cu nan ta bay personalmente, pasobra nan kier nan comprobante di pago mesora. Pero haci pago online ta facilita e contribuyente y e ta haya su comprobante online tambe.  Pero e ta un escogencia cu e ciudadano tin pero e tin cu tene cuenta cu e rij ta largo y e tempo di spera tambe, pasobra ya ta den recta final pa e fecha di pago.