No tin nada di sconde pa loke ta FASE

The content originally appeared on: Diario

Segun Minister Glenbert Croes: — * A lamenta cu tin hende cu a purba di abusa di e sistema — * 21 mil dossier a bay Archivo Nacional

ORANJESTAD (AAN):   Dialuna den sala di Parlamento tabata tin un reunion unda a trata entre otro e

Proyecto di LV cu ta contene normanan riba e provision temporal di apoyo financiero den forma di subsidio salarial FASE debi na e pandemia di COVID-19.

            Parlamentarionan presente a haya oportunidad di haci pregunta y duna nan ponencia relaciona cu e topiconan concerni. Mandatarionan a haya nan chens di hiba palabra y duna contesta.

            Minister Glenbert Croes, kende tabata encarga cu e cartera social tempo cu e subsidio di FASE (Fondo Social di Emergencia), a hiba palabra y el a enfatisa cu e no tin nada di sconde pa loke ta FASE.

            Contestando e preguntanan di e parlamentarionan, el a expresa cu ningun politico a hinca man den placa di e fondo aki den nan saco. Tur e placa a bay bek den man di pueblo.    El a bisa cu oposicion kier pone tur cos for di un perspectiva negativo.

            Ora di contesta e pregunta si tin hende cu a haya FASE cu a fayece, Minister Croes a laga sa cu tin dos caso di hende cu tabata na bida y cu a aplica pa FASE y cu na caminda a fayece.

            Manera cu esaki a bira conoci a para tur asistencia. Su speransa ta cu e asunto aki no ripiti, apesar cu no tin FASE mas. Pesey e aplicacion mester a wordo haci pa luna. E tabata un mecanismo di control, a subraya.

            El a lamenta cu tin hende cu a purba di abusa di e sistema y tur esaki lo wordo atendi cu ne.

            Banda di esaki a revela cu tin 21 mil dossier cu ya caba ta na Archivo Nacional y esey ta locual Algemene Rekenkamer a controla.

            E proceso tabata uno dinamico pasobra mester a bay parlamento y Ministerraad den un proceso pa FASE por a keda draai, e mandatario a expresa.

            Ley of cuminda? El a señala cu e decision a wordo tuma pa e famianan na Aruba por a sobrebibi y atende cu nan necesidadnan. Na Latinoamerica, a bisa, hopi hende den necesidad a bay den supermarket y comete sakeonan. Na Aruba esaki no a sosode danki na e ayudo cu Gobierno por a ofrece na e momentonan dificil aki.

            E mandatario a haci un repaso di tur e momentonan unda mester a tuma decisionnan relaciona cu e otorgamento di FASE.

            Croes a indica cu esnan cu por a haci mal uzo di e sistema ta minimo. “Ora cu papia di un glas di awa kier wak e parti bashi na lugar di e parti yen”.

            Relaciona cu e recomendacionnan di ARA, Minister Rocco Tjon, encarga actualmente cu e cartera Social, lo haci un anuncio relaciona cu esaki, Minister Croes a indica.

            El finalisa bisando cu e mision cu FASE a wordo cumpli. A percura pa Aruba y pueblo por a sobrebibi.