No ta descarta e necesidad di importa trahado pa e sector di turismo

The content originally appeared on: Diario

Ronella Croes, directora di ATA

ORANJESTAD (AAN)—Directora di Aruba Tourism Authority (ATA), Ronella Croes, a subraya den su entrevista cu DIARIO, cu enberdad Bushiri School tabata un modelo y ehemplo den e region.

“Y p’esey ATA kier yuda haci posible cu su sistema por bay mas y mas den e direccion ey, teniendo cuenta cu e necesidad di e dunadornan di trabao y e necesidad tambe di e proveedornan di educacion, y eynan ATA ta e ora ey”, el a remarca.

Esaki combina cu iniciativanan cu ta nace for di sector priva, cu tambe ATA ta scucha y ta respeta y wak con ta sostene nan tambe, el a señala.

Ronella a menciona cu esaki reconociendo tambe, cu tin cierto trabaonan den turismo pa cual no ta bay haya Arubiano p’e. Eynan ta bin e topico di imigracion, y loke a haci na añanan 90, cu a resulta fantasticamente pa Aruba, unda cu a acepta e realidad y a pone cierto tipo di trabao, pensa riba housekeeping y di unda ta bay importa. “Esaki ta un maneho di pais y bo por haci’e hopi dirigi manera cu a haci den añanan 90 di nos turismo, cu a atrae filipinonan”, Ronella Croes, CEO di ATA a indica.

El a recalca cu na final di dia e ta bay pa garantiza e servicio. Miho e servicio ta, por logra yega na cierto nivel di loke cada bishitante ta laga atras, y teniendo cuenta e ora ey con satisfecho nan ta, y e no ta un problema cu e servicio ta surpasa bo expectativa, y no ta haya e sentimento di a paga mucho y cu Aruba ta hopi caro, sino cu ta bal la pena, cu ta bal e prijs cu ta wordo pidi, y esey ta algo cu ATA ta monitorea hopi. Asina Ronella Croes, directora di ATA a conclui.