Ningun momento el a bisa miembro di KZP cu su casa a pidie pordon pa a mishi cu un mucha su pecho

The content originally appeared on: Diario

Señora di acusado ta reacciona

ORANJESTAD – DIARIO a wordo acerca pa Lourdes Veronica conoci como Rona, kende kier a aclarea cu miembro di KZP a bisa cu el a bisa cu su casa T. a pidie pordon.

   Ningun momento a bisa polis asina: Rona a duna di conoce na DIARIO cu el a keda asombra pa loke a sali publica di e caso contra su casa, camindia Hues a bisa cu segun relato di Polis, e señora a declara cu su casa T. a pidie pordon pasobra a pasa man na pecho di e mucha.

   Rona ta desmenti categoricamente cu su casa a pidie pordon y a bis’e cu el a pasa man na pecho di e mucha.

   Señora  a keda asombra di acusacion: Rona a duna di conoce na DIARIO cu ora 2 miembro di KZP a bin nan cas T. tabata trahando. Rona a bisa e miembronan di KZP, unda su casa ta trahando. E señora a bisa cu despues di 2 dia cu T. tabata deteni, 24 Augustus 2023, un miembro di KZP a bin cerca dje. E miembro di KZP a bisa Rona cu e kier haci preguntanan tocante e detencion di T. Rona a bisa, cu el a bisa e miembro di ZKP, cu e ta haya straño.

   Segun Rona, e mama M. di e mucha E. a manda yam’e. El a kere cu lo tin problema cu Rona su yiu homber cu ta M. su casa. E mama a bay na e cas y a puntra M. kico a pasa. E mama a bisa cu su yiu E. na school, ora Juffrouw tabata haci pregunta, na dado momento E. a hisa dede y bisa cu loke Juffrouw a puntra, su opa a mishi na su pecho. Rona a keda asombra di tende esey di e mama M. y a puntra, con por ta, na unda y con.

   Ningun rato acusado tabata cu e mucha: Rona a splica cu e mucha E. y su ruman ta keda cerca Rona, caminda e ta tira bista riba nan. El a splica cu nan ta keda den su camber y ora su casa T. yega cas banda di 11 or di mainta, e ta saca e muchanan y hiba nan den un otro camber pa T. keda su so y descansa pa despues bay traha bek.  Rona a bisa cu ora e tabata cerca e mama M., M. a reacciona si Rona no ta kere. Segun e mama M., ora e mucha tabata come na mesa, T. a bay mishi cu e mucha su pecho.

   Rona a splica cu ora e muchanan ta na cas, nan ta come y e mama ta sinta hunto cu Rona den veranda mientras cu e acusado T. ta sinta bou di un mata den cura dilanti hunto cu e yiu homber di Rona cu ta casa di M.

   Rona a sigui bisa cu e tata a bay busca e muchanan na school y ora nan a bin cerca Rona, e mucha E. a puntra e mama M. si el a bisa Rona. Ora M. a bisa si, e mucha a haci movecion manera cu e no mester a bisa Rona.

   Ta Rona a bisa T. pa bay pidi dispensa:  Despues cu tur hende a bay, Rona a confronta su casa, loke E. a declara. E momento ey un yiu muher di Rona cu ta biba na Hulanda, tabata na cas y a scucha tur loke Rona a bisa. Promer cu T. por a reacciona, e yiu aki a cuminsa zundra T. y yam’e pa pedofile.

   Rona e momento ey a hala e yiu su atencion cu no ta halza voz asina cu su tata. T. e momento ey a bisa e yiu pa no yam’e papi mas.

   Promer cu Rona a lanta pa bay den camber, el a bisa T., ya cu e asunto aki a trece henter un discordia den famia, pa T. bay pidi disculpa cerca e mama y tata di e mucha. Na mesun momento, Rona a tuma e decision cu e no kier tira bista mas riba e yiunan di su yiu homber. Rona a bay den camber y a mira su casa bay den camber, bista paña y sali bay na e cas. Segun Rona, T. na dado momento a yam’e y bisa cu el a bay haci loke Rona a bis’e pa haci. Segun Rona, T. a bis’e cu ta M. so a bay Cerca dje y el a bisa dispensa.

   No a bisa cu T. a pidi pordon: Segun Rona, esey ta loke el a bisa na e miembro di KZP y no ta compronde pakico ta pone cosnan cu nunca el a bisa.

   El a bisa cu e miembro di KZP a bin su so y tabata skirbi y Rona ta sospecha cu e miembro di KZP a graba tambe riba su smartphone.

   Firma declara cu e no ta compronde: Despues di tres dia, e miembro di KZP a bolbe bay na su cas pa e firma papelnan. Segun Rona, e papelnan ta na Hulandes y e no ta compronde Hulandes. E miembro di KZP no a puntr’e si e ta compronde Hulandes y tampoco no a traduci loke ta para riba e papelnan na Papiamento. Rona a djis firma e papelnan sin sa kico realmente ta para riba nan.

  Mirando loke a sosode den e caso contra su casa, Rona a bisa cu e ta conseha tur hende pa NO firma un declaracion cu bo no ta compronde. El a para riba cu ningun momento el a bisa cu su casa a pidie pordon y cu su casa no a bay pidi pordon. Ta el a bisa su casa pa bay pidi dispensa pa tur e discordia cu a crea den famia.

   Mester graba interogacion: Ta hopi biaha den Corte ta scucha acusadonan declara na Hues cu nan no a declara asina na e Polis. Hues ta confronta nan cu nan a firma e declaracion. Nan ta bisa cu e Polis a lesa e declaracion pero no ta manera Hues ta bisa.

   Pa kita tur duda, a bira tempo cu mester tin un traductor presente ora di interogacion y tambe graba e interogacion pa asina kita tur duda for di mesa. Den Corte mester tin e claridad den un caso pa asina Hues por tuma un decision cu ta basa riba e berdad sin ningun duda.