Negoshi di placa di henter mundo na wega!

The content originally appeared on: Diario

Aruba mester uni pa atende cu situacion mundial desastroso — *Placa di Arubiano tambe por ta na riesgo den e situacion actual  — *Informacion concreto y alarmante  pa henter pueblo comprende  

ORANJESTAD (AAN) — Na 1929 mundo a haya su mes na careda ora e mercado di balor na New York a crash.

The Great Depression a bira motibo directo pa Segundo Guera Mundial ora cantidad di hende a perde tur loke nan a inverti den nan bida.

Nos ta menciona e punto aki, pasobra Great Depression ta algo cu ta cende un luz cerca hende cu no ta meti den mundo financiero pero ta haci nan negoshinan.  Na mes momento nos ta adverti tur hende pa no kere cu loke awor ta pasa na mundo ta un repiticion di Great Depression, ya cu un “depression”, un caida total di e sistema financiero, ta algo cu ta presenta su mes como sorpresa.

Loke mundo conoce na e momentonan aki, ta un recesion, cu ta e proceso den cual mundo financieramente ta bay atras, manera tabata e caso na inicio di Siglo 21, ora Aruba por ehempel mester a introduci OB.

E hecho cu e situacion mundial no ta un depression, pero si ta haya e caracter di un recesion, ta di preocupacion grandi pa henter mundo ya cu ta e negoshi di placa di henter mundo, ta na wega.

Pa splica Aruba cu e mester prepara su mes pa temponan sumamente dificil, nos mester biaha cu Aruba pa New York, e centro financiero mundial.

E sector financiero di New York ta keda na Lower Manhattan y mundo ta topa na Wall Street pa hende haci negoshi den placa.

Pues na un centro financiero, na un mercado di balor, mescos cu na waf por cumpra diferente producto, continuamente hende por haci negoshi den balornan financiero.

Na un mercado di balor, hende ta gasta e placa cu e tin pa cumpra participacion den negoshinan.

Companianan tambe ta ocupa nan mes cu e actividad durante cual un hende ta of compania ta didici cu e ta hinca su placa den un compania y ta cumpra participacion den un compania.

E compania mas grandi te esun mas chikito na mundo, por tin mas cu un doño y na e bolsa di balor, e centro caminda ta bende participacion den propiedad, negoshi ta conoce su momento supremo.

Un persona por cumpra un accion den por ehempel un compania di aviacion; un seguro y tur otro tipo di negoshi.

Haci negoshi ta haya un contenido total na momento cu na e centro comercial, compra y benta di participacionnan den interes financiero ta tuma lugar.

Aki un hende por bira rico den dia pero hende por perde tur su placa den un rato tambe.

Por compara e forma cu hende ta haci transaccion como un tipo di “gamble”.

Un comerciante of compania ta dicidi cu e dia e tin bon chens pa bende “accionnan” (participacion den compania) na un bon prijs y ta pone su propiedad na benta.

Tin otro persona cu ta considera compra di e accionnan como un bon inversion y ta haci su gamble.

Esaki ta e negoshi di balornan na mundo, caminda companianan hopi importante ta dicidi di hinca nan placa y tin hopi Arubiano cu tin nan inversionan na Wallstreet.

Na momento cu Wallstreet conoce un crisis, placa di cantidad di hende y di compania ta na wega y esaki ta loke ta socede actualmente na New York, caminda e mercado di balor ta conoce caida constante mas serio for di 2020 ora Covid-19 a introduci su mes.

Caida di mercadonan di balor ta nifica cu cantidad di hende a perde nan placa y tin resultado serio pa henter mundo.

Ta bon pa splica cu Wallstreet di Merca ta uno di e mercadonan di bolsa mas conoci.

E situacion mundial ta afecta mundo financiero na forma sumamente severo y DIARIO ta bolbe bati alarma serio pa e situacion mundial cu ta presenta den un mundo cu a perde su controla financiero y economico y ta enfrenta uno di e periodonan mas dificil cu historia moderno a yega di conoce.

Den proximo edicionnan lo sigui guia Aruba riba e situacion comercial mundial sumamente peligroso pa bienestar di e Arubiano.