Na 2022 Huez ta haci trabou di Parlamento na 2013!

The content originally appeared on: Diario

2013 a entrega Aruba e eleccion mas cuestionabel den historia

*12-8 na 2009 a habri caminda pa democracia bira abuso

*Pa eleccion 2017 Mike y Benny a sconde rapport “Bo Aruba” 

ORANJESTAD(AAN)—“Il faux juger les mots d’aprѐs leurs dates”. Esaki ta sabiduria Frances, cu traduci na Papiamento ta mustra cu “Mester huzga palabranan despues di nan fecha”.

Awe Democracia ta triunfa den sala di Corte di Husticia. Esaki no pasobra un politico ta dilanti Huez, pero pasobra a keda demostra cu ni tempo por dera loke ta cuestionabel y mester wordo clarifica publicamente pa husticia vence pa henter poblacion.

Pa cuminsa nos mester trece dilanti cu ningun momento nos ta declara Benny culpabel, pero si nos ta yega na e conclusion cu partidonan politico mester tin mas atencion pa personanan cu nan ta pone na mando.

Si Benny como Ministro no tabata sa kico e ta firma, no tabata tin necesidad pa paga Benny tanto placa como Ministro y por a laga un mucha firma documento pa menos placa cu Benny a costa Aruba.

Loke realmente a keda presenta den Corte, ta algo historico. Cuerpo di Polis mester a investiga un caso diez aña despues di sucesonan, cu mester a wordo investiga dor di Parlamento di Aruba, cu tabata tin un mayoria di AVP na momento cu nan tabata tuma lugar.

Parlamento di Aruba ta e aparato di control di Pueblo di Aruba, cu ta paga politiconan bon placa pa haci un trabou, cu no ta exigi nan sikiera habri nan boca of tene nan wowo habri durante reunion.

Naturalmente ta keda e realidad, cu fraccion di AVP nunca mas por cuestiona moral ni integridad manera ley ta exigi, pasobra nan a impone presencia di Benny Sevinger como acusado den e caso Avestruz, den Parlamento cu ta traha Leynan cu Pueblo si mester respeta.

Esaki ta e prome abuso grandi. Juan y Pedro cu no tin placa pa “social drinks” mester respeta leynan cu mester di aprobacion tambe di Benny Sevinger, acusado di un caso den cual a condena democracia na morto!

Ley cu mester a sirbi e pober, a wordo uza pa entrega tereno den tempo relampago na “friends” di cual algun a aporta directamente na e resultado insolito di eleccion di 2013, ora ya Hulanda tabata prepara pa pone fin na e chiste di huelga di hamber di Mike pa scapa florin.

Parlamento di Aruba tabata completamente den man di AVP, cu a haci bofon di e Budgetrecht (e derecho pa dicidi riba entrada y gasto di Aruba” y a permiti Mike Eman hunga wega cu mitar BBO pa despues entrega Mike 1.6 Biyon pa hunto cu Benny e reparti proyectonan cu a lubida un sistema pa mihor produccion di campo pa Pueblo come y un sistema pa deshaci di sushi y asina evita huma di dump cu ta yuda hende muri.

Awe un Pueblo cu a hereda di Gobiernonan di Mike Eman e condena di debe nacional, ta sigui loke parce historianan di amor pa family and friends, cu e Parlamento di AVP na 2013 a permiti.

Awe mester yama danki na Husticia di Aruba cu a percura pa investigacion di loke a pasa bou nanishi di tur e Miembronan di Parlamento di AVP, cu na 2013 a aumenta den cantidad,  pa na 2014 asina Hulanda por a pone Aruba na cadena di supervision.

Na 2009 Mike Eman a ciega Pueblo cu e crimen contra Florin, ora el a baha BBO na mitar cu ta contra e base di Ley di Contabilidad cu ta proteha e base financiero di Aruba.

Pero asina AVP a cumpra e concenshi politico di Aruba ora cu 12-8 Mike a bira Ministro Presidente di Aruba, cu el a condena na desastre financiero y supervision Hulandes.

Pa gana eleccion na 2017 y no perde cara completamente, Gobierno di Mike Eman a sconde e rapport “Bo Aruba” di e autoridad financiero Algemene Rekenkamer Aruba, y asina a evita cu Aruba por a tuma nota na 2017 di loke awe ta e realidad financiero y social di Aruba.

Un caso historico ta desaroya den Corte di Husticia, cu mester atende e forma cu terenonan di Pueblo a cay den man di amigonan poderoso di Mike y Benny, manera bini dilanti den Corte.

Awe mas cu nunca nos ta aplaudi e sistema di Trias Politica, cu a permiti Husticia atende cu e forma cu un Gobierno, sin control di Parlamento cu mayoria di mes Gobierno, a entrega tereno na Family and Friends!