Motibo cu Raiz a orchestra eleccion mester bira conoci awe!

Cu sacrificio Pueblo di Aruba a alcansa recuperacion financiero

• Con a yega na cual coalicion pa kibra maneho cu a scapa Aruba
• Mike conoce Fondo Desaroyo Nobo, Bo Aruba y Caso Avestruz 

ORANJESTAD (AAN) Falta poco pa Pueblo di Aruba acudi na urna electoral pa dicidi kico lo pasa cu su futuro, cu awe conoce recuperacion na man di un Gobierno, cu a maneha e placa di Pueblo di Aruba cu concenshi.

Politica ta e arma cu a wordo introduci pa Pueblo por forma su Gobierno cu ta sirbi su interes, loke sigur no tabata visibel den e forma cu for di 1986, Aruba na diferente ocasion a wordo goberna.

Mike Eman  na 2024 sigur tin 40 cuarenta aña den politica, cu el a drenta como sombra di su ruman homber cu a introduci e sistema di hipoteca cu placa di Aruba, pa e recupera Aruba di e salida di Lago, cu a bira e ocasion pa deshaci di Betico Croes como e lider cu a alcansa Status Aparte di Aruba.

For di 1986 por mira con e prome intento contra Status Aparte a wordo haci cu introduccion di e sistema di hipoteca, te na momento cu Reino a bisa cu ta basta.

Mike Eman tabata presente for di e prome momento, cu placa di Pueblo a wordo uza na un forma cu a pone Reino bati alarma pa  e peligro cu e tabata representa.

Peligro cu a bini dilanti despues na e forma cu supuestamente AVP tabata percura pa crecemento economico, cu no tabata basa riba importacion di capital na prome lugar pero creacion di proyectonan, cu a bira arma mortal contra e Arubiano, manera Bo Aruba y Fondo Desaroyo Nobo San Nicolas a demostra.

E proyectonan di Fondo Desaroyo Nobo San Nicolas a resulta den casonan penal dilanti Huez cu a papia di corupcion cu a wordo condena.

Asina Gobierno di AVP a pone placa lora cu Fondo Desaroyo Nobo San Nicolas cu a termina na momento cu Mike Eman a dicidi cu e ta e salbador financiero di Florin cu el a mata cu introduccion di mitar BBO cu nunca e no por a elimina completo.

Atraccion di aventura economico tabata e motibo cu AVP a destrui Aruba. Aventura hancra den cantidad den Citgo di Nicolas Maduro pero tambe proyectonan di Bo Aruba, cu un deroche di placa di Pueblo, cu awe e Arubiano humilde mester paga.

Florin a muri practicamente na man di Mike Eman, cu na 2023 aparentemente a perte su Reino politico na man di cantidad di partido cu a wordo forma ora AVP a alcansa su pio punto cu desastre di Benny Sevinger cu terenonan pa family and friends, cu tabata directamente liga na Mike Eman.

Awe na un forma sano Pueblo di Aruba a logra su recuperacion y por nota con opositornan ta papia di un coalicion pa tene MEP, cu a percura pa Aruba por come, for di gobernacion.

Awe e pregunta grandi ta, cual ta e coalicion cu por bin bati na porta di e humilde Arubano cu ta paga cu su belasting pa tur e abusonan cu partidonan cu mayoria di miembronan di e supuesto coalicion di partido ta representa.

Pregunta grandi ta, kende a sostene  partidonan chikito cu diripiente a haya suficiente voto pa participa na eleccion y asina haci cu mas voto ta keda den aire den e resultado final.

Ta ki wega e supuesto coalicion kier hunga cu Aruba? Kico kier haci cu e placa di Pueblo cu ta placa di sacrificio di e Pueblo di Aruba cu mester a paga caro pa e abuso cu Mike Eman y su amigonan yega a haci cu Aruba.

Aruba ta prepara pa bay urna electoral. Kende ta bay forma coalicion cu mester evita cu MEP cu a haci un bon trabou y a pone pan riba mesa di Pueblo por sigui traha pa Pueblo?

Cu cifra nos ta sigui demostra kico ta nifica abuso di Pueblo cu a wordo cometi contra Pueblo di Aruba cu no por cay atrobe tras di e grupo cu a uni den Caso Avestruz, den Fondo Desaroyo San Nicolas y Bo Aruba y tur intento pa abuso politico cu placa di e sudor di frenta di e Pueblo Arubano.

Placa ta lora atrobe Mike y amigonan! Caminda a habri atrobe pa hiba maneho di abuso di placa di Pueblo si kere cu tin oportunidad.

Pakico mester a adelanta fecha di eleccion? Pregunta cu ta keda habri cerca un Pueblo, cu a rescata su economia y su asuntonan financiero y no merece wega politico cu atrobe ta destrui Aruba na man di Mike Eman y su vehiculonan scondi!