Monica Kock a bira president nobo di Camara di Comercio

The content originally appeared on: Diario

KvK ta anuncia directiva pa aña 2022:

ORANJESTAD (AAN): Conforme e stipulacion den ley, Camara di Comercio y Industria (KvK) ta representa comercio y industria di Aruba.

   E directiva di KvK, cu ta consisti di 9 miembro, ta worde elegi door di representantenan di negoshinan grandi “grootbedrijf” como tambe di negoshinan chikito “kleinbedrijf”. Den e prome reunion di directiva di KvK e miembronan ta elegi un presidente y un vice-presidente pa e aña actual.

   Alavez ta keda determina cual miembro lo fungi como e presidente suplente. E presidente y vice-presidente, hunto cu e secretario/director ehecutivo, ta forma e directiva diario di KvK.

   Pa aña 2022, e directiva di KvK ta consisti di señora Monica Kock como presidente, sr. Gavril Mansur como vice-presidente y demas miembronan, señora  Wanda Broeksema, sr. Daniele Ferrara, sr. Gerardus (Geert) Weber, sr. Eugene Farro, sr. Diederik Kemmerling, señora Lay Hing de Kort- Yee y sr. Omar Tromp cu lo fungi tambe como presidente suplente den caso cu e presidente of e vice-presidente ta ausente.

   E directiva di KvK ta encarga cu e maneho y strategia di e organizacion, cu asistencia di e secretario/director ehecutivo, sr. Martijn Balkestein kende alavez hunto cu e personal di KvK ta percura pa e funcionamento y actividadnan diario di KvK.

   Un team cu tin comercio na pecho: E directiva di KvK ta hopi entusiasma y KvK ta premira cu e aña benidero nos lo sigui sinti e efectonan di e pandemia y cu henter nos comunidad, specialmente nos comerciantenan y nos gobierno, lo worde confronta cu diferente retonan adicional.

   Pa por yega na un recuperacion di nos economia y stabilidad social, mester haci varios reforma y tuma accion urgentemente, caminda cu ta sumamente importante pa tur stakeholders traha huntu cu e interes comun di supera e situacion dificil aki cu ainda nos ta confrontando y crea un miho porvenir cu ta duradero y sostenibel.

  E board ta consisti di empresarionan cu tin Aruba y e sectornan comercial na pecho y cu den nomber di sector priva ta traha duro pa mantene bon comunicacion cu sector publico.

   Directiva di KvK ta dispuesto pa sigui duna su aporte y lo keda boga pa tin mas dialogo entre gobierno y e sector priva pa asina conhuntamente por atende e diferente puntonan di atencion y di  preocupacion di e sector comercial. KvK lo percura pa ta mas activo e aña aki y lo organiza diferente actividadnan pa ricibi feedback di nos empresarionan y tambe pa KvK por comparti informacion y experticio.