Miss Universe Aruba nobo papiando di e importancia pa e isla sigui siña di lesnan di bida pa por avanza

The content originally appeared on: Diario

Elocuente discurso di Kiara Arends

ORANJESTAD (AAN): Diadomingo anochi pa exactamente 8:58 pm, publico presente den Crystal Theatre na Renaissance Mall, a haya sa cu Kiara Arends di 23 aña a wordo escogi pa bira e Miss Universe Aruba 2022.  Un aplauso inmenso a acompaña e anuncio aki.

   Kiara Arends ta conoci como e ganadora maximo di Miss Teen Aruba na aña 2017.  For di comienzo caba a mire como un persona cu lo triunfa hopi den bida, y sigur den su estudio.

   Despues di a atende Colegio Arubano, el a sigui pa Universidad di Aruba unda el a haya su propedeuse, y despues a obtene su grado studiando Ley.  El a core stage tambe na bufete di abogadonan Kloes, Kock and Partners.

   For di Juli 2021 te cu Januari 2022, el a atende Katholieke Universiteit Leuven na Belgica, unda el a optene su Master’s Degree den International Business, Trade and Tax Law.

   Dia 31 di Maart 2020 net mey-mey di e comienzo di pandemia di Covid-19, el a funda e organizacion di caridad yama “BUMP”, cu nifica ‘Benefitting Upcoming Mommies during the Pandemic’ Aruba.

   Riba escenario den Crystal Theatre, Kiara a dirigi su mes na Papiamento pa splica cu pa hopi aña caba e deseo tey pa conquista e corona, y aunke e no tabata facil, hopi biaha a yega cerca si.  Pero cada biaha cu ta topa un obstaculo, esaki as yuda pa avanza.  Y tur e lesnan cu a siña sobrepasando e obstaculonan aki, awor por wordo usa pa futuro.

   Kiara a bisa cu su promesa pa e isla ta pa e ta un digna representante di tur e balor y cualidadnan di nos como Arubiano, cu nos perseverancia, nos dignidad, pero tambe e hecho cu nos nunca ta rindi.

   Ademas di ta un representante internacional, Kiara kier ta un luz den scuridad aki na Aruba.  Asina por eleva e situacion social cu nos ta bibando aden.

   Kiara a bisa cu despues cu el a funda e Organizacion BUMP beneficiando mamanan den necesidad, el a yega na e realizacion cu pobreza no ta solamente “falta di cuminda” of “falta di paña”, pero tambe ta falta di inclusion.  Aki el a agrega cu tambe tin e “falta di concientizacion”.

   Na Hulandes el a sigui bisa, cu e guera di mas severo cu tin, y e pandemia di mas grandi na mundo ta socede mey-mey di e oreanan di ser humano.  Pesey ta importante pa no djis bay duna e hendenan un pida pisca, pero cu ta bay siña nan tambe con pa captura pisca, pa asina nunca hamas nan por sigui sufri di hamber.”

   Pesey e lo semper boga pa educacion, pasobra esaki ta e arma mas fuerte cu por usa pa cambia mundo.

   Kiara a bisa cu awor cu e tin e corona, lo importante ta pa pone e nomber di Aruba na halto den mundo.  E hecho cu Aruba tin 92 nacionalidad bibando aki, ta haci e isla caba un ‘universo’.  “E unico cos cu falta ta e corona!” tabata su ultimo palabranan.  Aki publico a bira loco di alegria y a aplaudi sin fin.