Miss Aruba Thessaly Zimmerman a logra sali entre e 10 finalista di Miss Universo 2021

The content originally appeared on: Diario

ORANJESTAD (AAN): Cu su beyeza, caracter y tremendo carisma, Miss Aruba Thessaly Zimmerman a descata durante e certamen mas importante di beyeza na mundo y a logra sali entre e 10 finalista di Miss Universo 2021.


Segun varios experto di certamen, Thessaly ta un hoben sumamente carismatico, cu un sonrisa contagioso y esaki a resalta masha hopi mes durante su participacion. Aruba sigur a wordo dignamente representa y Thessaly a haci un tremendo trabao den 70 edicion di certamen internacional di beyeza cu a tuma lugar na Eilat, Israel. Ultimo biaha cu Aruba a logra sali den top 10 tabata na 1996.

Otro representantenan cu tabata den e top 10 tabata Miss Paraguay Nadia Ferreira, Miss Puerto Rico Michelle Marie Colón, Miss Estados Unidos Elle Smith, Miss India Harnaaz Sandhu, Miss Sudáfrica Lalela Mswane, Miss Bahamas Chantel O’Brian, Miss Filipinas Beatrice Luigi Gomez, Miss Francia Clémence Botino y Miss Colombia Valeria Ayos.

Miss India, Harnaaz Sandhu a wordo corona como Miss Universo 2021. E ta di tres concursante di India pa logra e titulo di Miss Universo despues di Sushmita Sen na 1994 y Lara Dutta na 2000.