Ministronan a bay bishita Funari y tambe Archivo Nacional

The content originally appeared on: Diario

ORANJESTAD (AAN): Esaki ta “Siman di Archivo”.  Pa Gobierno, e ta un siman importante pa colecta loke nos kier pa worde conserva pa nos futuro generacionnan por conoce kico ta e historia real di Aruba”

   Dialuna 6 di juni, Prome Minister Evelyn Wever-Croes a compaña colega Minister di Cultura Xiomara Maduro y hunto cu Funari, na e apertura di Siman di Archivo na Archivo Nacional Aruba, (ANA). Prome Minister a expresa cu esaki tabata un mainta hopi ameno caminda el a haya e oportunidad tambe pa dirigi algun palabra di gratitud y sosten na e team di ANA y na Minister di Cultura.

   “Saliendo di e pandemia, poco poco cosnan ta bay mas na normalidad maske nos a cuminsa cana cu e mondkapje atrobe pero nos por sali ainda, comparti, nos por keiro poco y p’esey mi ta hopi contento cu e aña aki boso a organiza algo asina bunita y grandi.

   Ta importante pa nos archiva. Temponan ta bay hopi lihe, desaroyonan ta bay hopi lihe. Tempo mi yiunan tabata chikito, 20 aña pasa nos tabata graba tur cos riba un video, e video cassettenan grandi cu awendia bon por haci nada mas cu nan.

   Kiermeen poco poco nos ta perde tur loke nos a pasa aden si nos no ta na tempo, P’esey e siman aki ta asina importante pa nos cada un para keto na kico nos kier pa colecta of trece akinan pa e worde conserva pa nos futuro generacionnan por conoce kico ta e hsitoria real di Aruba.

   Danki na team di Archivo Nacional pa tur e trabao grandi cu boso ta haci den conserva historia di pais Aruba. Danki pa organiza e siman importante aki y danki tambe na Minister Xiomara hunto cu henter e ekipo di ANA pa haci e siman aki extra especial”.

   Prome Minister ta invita pueblo di Aruba participa na e evento 3C-TRECE diasabra 11 di juni, pa nos COLECTA, CONOCE y CONSERVA material historico pa Aruba.