Ministro Ursell Arends ta pone e prome paso pa duna Naturalesa e derecho cu e merece

The content originally appeared on: Diario

ORANJESTAD (AAN): Diabierna 22 di april 2022, riba Dia Internacional di Mama Tera, Minister di Naturalesa sr. Ursell Arends ta anuncia iniciativanan pa trece Derecho di Naturalesa den Aruba su constitucion.

   Nos ta bibando den un mundo unda cu e bos di nos naturalesa no tur bes ta worde considera ora ta trata decisionnan importante, decisionan cu tin efecto riba nos naturalesa, nos medio ambiente y tambe nos bida como ser humano riba e unico planeta cu nos tin.

   Minister Ursell Arends riba dia di Tera ta subraya cu loke bo duna tera, tera ta duna back y actualmente cambio climatico ta tera su suplica pa un miho trato. Pa e motibo ey mes nos tin cu cuminsa cana e caminda pa duna naturalesa e respet cu e merece y e derecho pa existi y evoluciona den un manera corecto. Naturalesa no solamente mester worde uza como fuente di recurso pero tambe respeta como parti di Mama Tera su ecosistema.

   Na mundo, mas cu 25 pais ta forma parti di e movemento di Rights Of Nature (Derecho di Naturalesa), un movemento cu Aruba tambe por implementa pa hunto nos recupera e balansa sano y sostenibel entre e ser humano y Mama Tera.

   Door di introduci Derecho di Naturalesa, cada ciudadano lo por fungi como un defensor di nos naturalesa. Minister Ursell Arends ta reconose cu nos Aruba dushi tera como parti di Mama Tera, e unico tera cu nos tin, merece mas. Aruba su naturalesa merece nan derecho.