Ministro Endy Croes hunto cu ekipo di FUTURA a reuni riba proyectonan inovativo pa enseñanza pa aña escolar venidero

The content originally appeared on: Diario

ORANJESTAD (AAN): E organizacion FUTURA desde 2018 te awor a tuma varios iniciativa den pa tecnologianan moderno brindando

primordialmente e posibilidad na nos hobennan den enseñansa pa explora conocemento cu e mundo di innovacion aki.

   Asina FUTURA a logra cristalisa diferente proyectonan piloto den e mundo digital manera  tecnologianan nobo den diferente klas unda a aloca ‘C-Touch screens’ na Cacique Macuarima School, Pastoor Kranwinkel y St. Franciscus College y Mobiel Techlab maneha pa Metabolic Foundation. Mobiel Techlab por ehempel a worde sostene cu fondonan di EU na inicio pa 18 luna largo y despues Gobierno y Futura a tuma esaki over te momento Pandemia a bati na nos porta y hopi actividad a worde poni ‘on hold’.

   Diamars ultimo Minister Endy Croes a reuni cu representantenan di FUTURA señora Jefryene  Dijkhoff y sr. Pancho Croes kendenan a presenta un idea piloto pa aña escolar benidero. Ta trata di proyectonan di digitalisacion manera E-learning unda scolnan lo participa y entrega nan proyecto cu nan kier desaroya pa nan scol y/of klas a traves di un ‘projectplan’.

   Pa cu esaki tin un panel di expertonan kendenan lo scoge e proyectonan ganado pa cada kwartaal. Scolnan lo haya mas splicacion y detaye di kico tur nan mester cumpli cune prome cu entrega nan ‘projectplan’ pa asina nan por bin na remarca pa logra gana y ricibi un inversion pa nan proyecto di E-learning.

   Minister di Enseñansa y Deporte Endy Croes a splica hunto cu Minister President señora Evelyn Wever – Croes y su Ministerio den colaboracion estrecho cu FUTURA ta sostene ideanan pa proyectonan piloto unda FUTURA ta aloca 400 mil Florin pa e proyectonan aki. Cada cuartal un promedio di 100 mil Florin lo worde inverti  na proyectonan ganador cuminsando e aña escolar 2022-2023. Den simannan nos dilanti lo reuni cu tur ‘stakeholders’ y directivanan di scol pa asina inicia cu e proyecto aki.

   Den conferencia di prensa lo elabora mas extenso riba esaki. Cu creatividad ta logrando hopi pa enseñansa.