Ministro Endy Croes a mustra cu ta bay cuminza awor cu renobacion di St. Aloysius School

The content originally appeared on: Diario

ORANJESTAD (AAN): Diahuebs mainta durante conferencia di prensa di Gobierno di Aruba, mandatario di Enseñansa a comparti e informacion cu trabao di renobacion di edificio di St. Aloysius School na Noord ta bay cuminsa prome cu fin luna di april 2022.

   St. Aloysius School manera diferente otro scol ta uno di e scolnan cu tin varios aña caba pafo di nan edificio. E edificio cu e scol ta aden actualmente no ta esun di mas adecua ni pa alumnonan y tampoco pe docentenan.

   Minister Endy Croes a enfatisa cu danki na creatividad pa maneho di recursonan y hopi ehercicio interno, a logra aloca fondonan necesario sin mester a presta placa adicional pa e proyecto aki. Tambe e mandatario a indica cu ya caba parti di e placa a worde traspasa pa SKOA, kende na final ta esun cu ta scoge e contratista cu lo haci e trabao.

   Fin di luna di april e trabaonan di construccion pa cu e proyecto di renobacion ta programa pa cuminsa. Lo renoba e hala banda di noord, zuid, biblioteca, bañonan, oficina, ful e cura di scol, speelplaats y alavez ful e parti di coriente. Si tur cos bay bon manera e pronosticonan ta awor  e alumnonan lo por ta back den nan scol prome cu fin di e aña aki.

   Minister Endy Croes a agrega cu el a mira e diseñonan cu ta hopi moderno y bunita. Finalmente e mandatario a expresa; mi ta sigur cu mayor, docente y tur ‘stakeholder’ den e veld di enseñansa lo ta hopi contento pa cu esaki. Poco poco pero sigur y firme nos ta pone atencion na infrastructura di scolnan. Aunke retonan ta hopi grandi y tempo nos dilanti ta hopi dificil nos lo percura pa duna ensenañsa haya e luga cu e merece. Pabien Noord, pabien ne veld di enseñansa y pabien sigur na tur e alumnonan y na tur ‘stakeholders’. Pabien SKOA!