Ministro a reuni cu esnan di UNESCO y Comite Olympico Arubano riba asunto Anti-Doping

The content originally appeared on: Diario

ORANJESTAD (AAN): Recientemente den un esfera ameno Minister di Enseñansa y Deporte Endy Croes hunto cu sr. Rodymar Geerman a reuni cu Secretario General di UNESCO,

señora Marushka Lee -Tromp y Director di Sports Development di COA, sr. Patrick Werleman alavez Presidente di e comision di Anti Doping.

   Inicialmente a informa e mandatario di Deporte cu mester tuma algun accion cu urgencia. E casonan di doping riba plataforma mundial ta birando hopi mas estricto y si paisnan cu no ta cumpli nan por subi riba e lista preto. Cada dos aña paisnan mester yena varios formularionan pa por keda den cumpli cu standardnan internacional.

   Tin dos aspecto hopi importante unda e Comision Anti Doping ta cana su caminda y ta yena documentonan rekeri. Mientras Gobiernonan rond mundo a traves di un tratado tambe como Gobierno di e pais mediante UNESCO cu ta instancia central den esaki mester yena nan documentonan tambe riba nivel di Gobierno pa cumpli cu e rekesitonan. Esaki ta conoci bou di e nomber “Add Logic”.

   Pa algun rason no mucho conoci Aruba ta coriendo atras primordialmente como Gobierno y lo mester pidi un extension di algun luna pa por cumpli. Minister di Deporte a ricibi tur e informacionnan aki y a pone nan riba un lista di prioridad pa asina como pais, Gobierno cumpli cu su parti aki pa asina evita cu Aruba por worde aloca riba un lista preto y evita pa perhudica nos deportistanan.  Manera Minister Endy Croes a termina bisando mannan na obra, pa nos cumpli y recupera un bon status riba e tema aki. ‘Finalmente por mira atras riba un tremendo reunion’, e mandatario a expresa.