Ministerio Publico: Yuri Bracho ta sigui sospechoso di husticia

admin

Ministerio Publico Yuri Bracho ta sigui sospechoso di husticiaORANJESTAD   (AAN): “E investigacion ta sigui. E ta keda sospechoso, numa no mas den detencion. E no a wordo absolvi, e no a sali liber of algo asina. E ta sigui bao investigacion”, asina Vocero di Ministerio Publico a contesta riba nos pregunta relaciona cu e caso penal cu husticia a inicia contra e tramitado Yury Bracho.

Fiscal a detene diaranson pero a lage bay diabierna, debi cu no ta haya necesario tene cera mas dia pasobra e investigacion no ta rekeri esey.

    Diaranzon ultimo Polis a tene un huiszoeking na cas di Bracho situa na Kudawecha. Durante e accion aki a detene Yuri Bracho, naci na Venezuela di 35 aña di edad, e ta doño di Yuri Realty Consultancy, bou sospecho cu e ta estafa su clientenan. 

    Cerca e sospechoso aki, autoridadnan a descubri 4 trahado, di cual tres tabata ilegalmente na Aruba y 1 tabata na Aruba riba un visa di turista. E 4 personanan a wordo saca di Aruba mientrastanto.

    E sospecho ta cu e muher a pidi placa pa paga boetnan relaciona cu empleo ilegal di e personanan cu a wordo haya ta traha pa su cliente, mientras cu en realidad e boetnan aki nunca no a wordo saca. E sospechoso mester a presenta diabierna dilanti Huez-Comisario si acaso Fiscal lo tabata kier prolonga su detencion cu 8 dia mas pero esey no tabata necesario.

    Asina cu Yuri Bracho a sali di prizon, mesora el a subi red social y bisa cu e noticia ta falso y cu e tey masha bon y cu nada ta berdad. Cu e declaracion di Ministerio Publico, ta confirma cu e no ta liber di acusacion y cu e ta sigui di ta un sospechoso di husticia, solamente cu no ta mira necesario mantene encarcela mas. Na momento cu present’e dilanti Hues, ainda e ultimo aki por opta pa duna e sospechoso castigo di prizon, si e haya cu e pruebanan ta suficiente pa traduci den un condena.

    Riba red social a nota cu su popularidad den comunidad no ta mucho grandi, specialmente pa su forma di expresa contra Arubianonan. E mes ta naci na Venezuela, ta un promotor fiel di e Gobierno Chavista di Republica Bolivariana di Venezuela, pero cu entretanto tin nacionalidad Hulandes caba. Riba red social varios otro persona a bin afo pa bisa cu nan tambe a bira victima di estafa di Bracho, cu e ta cobra hende sin regla nan permiso pa nan. Tambe a menciona asunto di cobra pa haya e “carta di garantia” pa drenta Aruba y mesora pidi pa un estadi di 3 luna.

    Simultaneamente na e caso aki, Husticia ta investigando con henter e asunto aki di permiso di estadia y di trabou ta hinca den otro, pa mira si tin un of mas hende ta haci nan mes culpabel na delitonan criminal. Ya caba tin un empleado di Inmigracion encarcela pa algun siman, otro hefe na Inmigracion ta suspendi, a move algun consehero di Ministerio di Infrastructura y Integracion, a reorganisa DIMAS mientras cu a nombra un “Ketenmanager” nobo pa supervisa e trabounan entre tur departamento cu ta atende cu maneho di permiso di estadia y trabou.

Next Post

MEP: Mester investiga Michelle Hooyboer-Winklaar

ORANJESTAD    (AAN):  Segun partido MEP, siman pasa a sali den publicidad e recibo di un caso cu minister Michelle Hooyboer-Winklaar a cuminsa den aña 2015, contra e corant Solo di Pueblo y su director Edmond Croes. Tabata trata di un caso di difamacion, pasobra e corant a publica varios articulo […]