Ministerio di Husticia y varios departamento hudicial a lansa campaña ‘trafico sigur’

The content originally appeared on: Diario

ORANJESTAD (AAN): Dialuna mainta, durante un conferencia di prensa di Gobierno di Aruba, Minister di Husticia y Asuntonan Social Sr. Rocco Tjon,

a anuncia e lansamento di campaña nobo di conscientisacion pa siguridad den trafico. Esaki lo cuminsa entrante prome di Maart.

   E meta principal di e campaña ta pa mehora siguridad riba caminda, reduci accidentenan y salba bida. Durante e campaña lo enfoca riba educacion y conscientisacion tocante e factornan di peligernan mas comun manera; core bou influencia di alcohol, core cu velocidad halto, distraccion den auto, uzo di seat belt y child seat. Tambe, lo educa riba interseccionnan den trafico, cu pa hopi hende ta trece confusion y por causa accident.  Lo bay usa diferente plataforma di media pa divulga informacion vital na comunidad. 

   Durante e campaña aki lo lansa e website www.traficosigur.aw, un hub centralisa y diseña pa brinda comunidad recursonan importante pa mehora siguridad den trafico. E website lo tin contenido educacional cu lo cubri un variedad di topico pa tur usuarionan di trafico. Topiconan manera peligernan di trafico actual, tips pa preveni accidente, reglanan y leynan di trafico, con pa core of anda riba caretera nan nobo manera Watty Vos Boulevard y Green Corridor y hopi mas. E Website tambe lo tin un sesion interactivo di Pregunta y Contesta (Q&A) cu ta dirigi na contesta preguntanan mas comun y preocupacionnan di comunidad.

   Mayoria di e accidentenan cu ta sosodiendo den e ultimo añanan a base di factornan cu ta pone nos mes y otronan na peliger, cual facilmente por worde evita. Na final di aña 2022 a registra 7,341 incidente riba caminda di cual 13,069 persona tabata envolvi y 75% di e accidente nan aki a worde causa pa falta di atencion of distraccion riba caminda.

   Parti di e campaña ta bay encera tambe un encuesta pa brinda mas participacion integral di comunidad caminda tur usuario di trafico, sea manehadonan di auto, ciclista, motociclista y peaton por comparti nan preocupacionnan, nan opinion y sugerencia.  E enfoke inclusivo aki ta sigura cu e strategianan di e campaña ta adapta pa atende e necesidadnan specifico y retonan cu nos comunidad ta enfrenta.

   E iniciativa aki ta resultado di colaboracion di diferente stakeholders den e veld hudicial cu ta bay promove un cultura di siguridad den trafico. Comision Trafico Sigur ta encurasha cada ciudadano pa forma parti di e iniciativa aki por medio di haci uzo di e website www.traficosigur.aw  y educa su mes cu informacionnan oficial di trafico. Por haci pregunta y comparti opinion y preocupacion via e website of yenando e encuesta.  Pues, ta pidi nos comunidad pa keda pendiente pa e informacionnan cu pronto lo keda publica tocante di e lansamento di e Website.