Minister Thijsen a participa den conferencia di OCTA na New Caledonia

The content originally appeared on: Diario

ORANJESTAD (AAN): Di 17 pa 22 november a tuma lugar e di 19 OCT-EU Forum na Noumea, New Caledonia.

E OCT-EU Forum ta un Conferencia caminda e 13 paisnan y teritorionan ultramar (LGO) kendenan conhuntamente ta forma e asociacion OCTA (Overseas Countries and Territories Association) ta reuni un bez pa aña cu Comision Europeo pa intercambia di ideanan, evalua e actual cooperacion y haci palabracionnan con pa sigui mehora e cooperacion existente. Aruba a ser representa pa Minister Plenipotenciario, sr. Juan Thijsen.

            Durante e conferencia Aruba a vocifera di ta contento cu e relacion  cu Union Europeo. E relacion aki ta hasi cu nos por haya sosten pa hasi projectonan no solamente local, pero tambe cu otro islanan den region y nos por tin acceso na fondonan di diferente programanan cu Union Europeo ta ofrece. Pero no ta solamente loke nos por ricibi di Union Europeo ta importante, pero tambe loke e islanan por ofrece na Union Europeo. Por ehempel Aruba ta stratigicamente bon situa y por facilita e entrada entre Europa y Latino America, apesar di ta un isla chikito nos tin un bon infrastructura cu un airport international, un puerto grandi y un network di comunicacion excelente.

            Pa e proyecto local, e asina yama “Multianual Indicative Program for the Territorial allocation 2021-2027”, Aruba a scohe pa hasi nos gobernacion mas sostenibel por medio di digitalisacion y lo implementa E-Government Road Map 2021-2027. E proyecto aki a ser aproba pa Union Europeo na October 2021 y Aruba lo ricibi 12.5 miyon Euro pa implementa esaki. Durante e conferencia e Commissioner, sra. Jutta Urpilainen, a bisa cu nan ta hopi contento cu Aruba como e promer den Caribe a scohe pa e proyecto aki.

            Tambe a haya e grato noticia durante e conferencia cu Comision Europeo a aproba e “Multianual Indicative Program for the Caribbean Regional allocation 2021-2027”. E islanan den Caribe ta confronta e mesun retonan. Gran parti di e economia di e islanan ta depende di import. Na momento cu tin problemanan mundial (e.o. guera na Ucrania) nos ta sinti e impacto dibiaha ariba nos economia, abase di subida di prijs. E pandemia y desasternan natural tambe tabatin su impacto ariba e islanan. Pa es motibo aki a opta pa un proyecto caminda lo focus pa mehora y fortalece un maneho sostenibel di e capital natural di e paisnan, entre otro: seguridad di alimentacion y nutricion, un bon maneho di nos awanan. Proteccion, restauracion y bon maneho di biodiversidad y mehoracion di e cooperacion entre e islanan.

            Hulanda a wordo representa pa e embahador di Reino Hulandes na New Zealand, sr. Ard van der Vorst. Den un encuentro entre Hulanda y e 6 islanan den Reino Hulandes, a intercambia diferente ideanan y a vocifera algun punto di atencion. A palabra cu mirando cu e islanan ta enfrenta e mesun retonan, lo ta bon presenta un “joint paper” caminda ta pidi atencion di Union Europeo pa e puntonan aki y tambe con por aplica na fondonan specificamente pa e retonan aki.

            Na final di e conferencia e presidente di New Caledonia, sr. Louis Mapou, kende alavez tabata e Presidente di OCTA den 2022 a hasi entrega di e mandato pa 2023 sr. Kalistat Lund, Minister di agricultura,  auto suficiencia, energia y medio ambiente di Groenlandia. Groenlandia tin e presidencia di OCTA durante 2023 y Aruba a ser escohi como Vice-presidente. Na 2024 Aruba lo ta e Presidente di OCTA y lo organisa e di 21 OCT-EU forum na Aruba. 

Potretnan ta cortesia di Arubahuis.