Minister Rocco Tjon a haci bishita anual na Departamento di Asuntonan Social

The content originally appeared on: Diario

ORANJESTAD (AAN):  Dialuna mainta, minister di Husticia y Asuntonan Social sr. Rocco Tjon hunto cu trahadonan di Ministerio di Husticia y Asuntonan social

como tambe trahadonan di Departamento di Asuntonan Social (DAS), a haci su bishita anual na e departamento aki.

            E meta di e bishita aki ta pa “touch base” cu diferente departamento, pero mas aun pa brinda oportunidad na e personal cu tin deseo pa cu esaki y asina combersa cu nan, scucha nan ideanan y retonan.

            E mandatario a indica di ta sumamente satisfecho di por a combersa cu personal cu ta traha den diferente departamento. Ta trata di e departamento cu ta brinda e cuido, e prome y di dos linea, pero tambe esnan cu ta traha den e departamento nan cu ta brinda e sosten na e proceso nan primario. Banda di esaki, a haya e oportunidad di duna un splicacion tocante e diferente proyecto nan cu ta den pleno ehecucion, pero tambe scucha e ideanan di e personal mes.

            Un cos cu a resalta di e bishita aki ta e deseo pa sigui inverti den e personal pa loke ta amplia nan conocemento. Den e plan di maneho pa 2024, cual a ser ricibi for di februari 2023, esaki ta forma e parti esencial di e maneho pa loke ta trata 2024. Actualmente, DAS ta pasando door di un restructuracion di e organisacion, cual ta hopi importante pa asina por brinda mas perspectiva na e personal, pero tambe por adapta na e demanda cu ta bin riba e organisacion y di e forma ey brinda un miho cuido y un miho ayudo na tur esnan cu tin mester di un di e productonan cu DAS ta ofrece.

            Banda di esaki, na februari lo bay inicia cu e trayecto di ISO, cual ta sumamente importante pa di e forma aki por eleva e servicio y calidad cu ta wordo brinda door di DAS. Ta trata di un trayecto cu centro ortopedagogico a culmina, kende a indica cu esaki tawata un experencia positivo y efectivo, pa cual motibo a dicidi di brinda esaki na DAS tambe.

            Alabes, pa loke ta e parti infrastructural, dentro di tres siman e mudansa lo tuma luga, caminda lo muda for di e edificio di FCCA pa e edificio completamente renoba na Lagoenweg. E ultimo trabounan ta tumando luga, caminda ta cambiando e airconan, pa asina e grupo por muda bek pa e edificio renoba. Na mes momento ta bay inicia cu e ultimo fase di e renobacion cual ta e parti di electrico, pa asina tur departamento di DAS por muda bek na e edificio aki.

            Diferente departamento di DAS ta brinda hopi sosten na clientenan, sosten individual a base di diferente tools y matrix cu nan a introduci, pero banda di esaki un ayudo mas specialisa na famianan cu tin mester di esaki. Tambe, a pone enfoke riba e bijstand trekkers,  a base di brinda curso manera “entrepreunership” “budgeting” y tambe a inicia cu un grupo pa brinda yudansa pa yega na un cupo di trabou riba mercado laboral.

            Por ultimo, dentro di poco e ekipo cu ta ubica na San Nicolas tambe lo bay muda na un luga temporario, pa asina hunto cu DOW por examina e trabounan cu mester wordo haci na e edificio situa na San Nicolas, pa asina por renoba esaki tambe a partir di 2025. E mandatario a indica cu e ta sumamente contento cu e trabounan cu a wordo haci, y na mes momento ta gradici henter e ekipo di DAS pa e trabou sublime cu nan ta haci pa comunidad di Aruba.