Minister Otmar Oduber a firma tratado na Washington den nomber di Reino Hulandes

admin

ORANJESTAD (AAN) Minister Otmar Oduber ta na Washington D.C. unda cu e la firma un tratado importante den nomber di Reino Hulandes.

Como gran logro ta considera e tratado cu Aruba afirma diahuebs den nomber di reino cu Transportation Security Administration di Merca, esta T.S.A. ta e oficina cu mester garantisa proteccion di e sistema di transporte di Merca y sigura e movemento liber di tanto hende como comercio.

Un tratado di e indole aki ta di gran importancia pa un pais manera nos, cu enfoke asina skerpi riba e turista y negoshi cu Merca.

Minister Otmar Oduber ta firma e acuerdo aki despues di un proceso cu a cuminsa algun aña atras. E firmamento di e tratado aki ta hopi importante pa Aruba, Minister Plenipotenciaro na Merca Andy Lee tambe tabata presente y a forma parti di e negociacionnan y ta felicita Minister Otmar Oduber cu e logro aki.

Esaki ta trece un cantidad di beneficio pa Aruba den siguridad pa nos Aeropuerto y Waf. Sr. Edwin Kelly director di Directie Luchtvaart tambe tabata presente na e firmamento aki.

Cu e tratado aki concretisa lo por facilita pasaheronan cu ta biaha di Aruba bay Merca cu nan no mester pasa un screening un biaha mas pa por sigui pasa den destinacionnan den Merca mes.

E proceso pa por a yega na e tratado aki tabata uno largo unda cu diferente instancia a participa na dje entre otro AAA, Directie LuchtVaart, Directie Buitenlanse Betrekkingy Ministerio di Transporte cu lo trece impacto positivo pa Turismo di Aruba.

Director di Directie Luchtvaart ta kere cu Aruba a yega na un bon tratado unda cu tanto Aruba y Merca lo tin bon beneficio di dje.

Esaki ta significa cu Aruba lo bay traha hopi estrecho cu T.S.A  unda cu lo por cambia informacion riba e nivel di siguridad y aviacion. Tambe ekiponan cu lo por wordo uza pa screening Aruba por beneficia di esakinan tambe.

Minister Otmar Oduber ta sumamente orguyoso y satisfecho con henter e proceso a cana y awe por bisa cu Aruba ta esun cu a sali mas beneficia den esaki pa loke ta trata siguridad na Aruba su aeropuerto, pero tambe e flexibilidad cu por tin di facilita e proceso di screening pa Merca.

Next Post

Adicto ambulante lo a overdose den Playa

ORANJESTAD(AAN)– Diahuebs atardi un patruya di polis pasando riba J.G. Emanstraat a wordo para pa un persona y a bisa nan cu un adicto lo a bira malo patras di e edificio bandona unda tabata tin un gym. Di biaha polis ta baha y bay tira un bista y a […]