Minister Maduro ta felicita Karol Croes pa su representacion na e di 72 competencia di Miss Universe

The content originally appeared on: Diario

ORANJESTAD (AAN):  Minister di Cultura, Xiomara Maduro, a duna un cordial bonbini na Miss Universe Aruba, Karol Croes, na su regreso for di e di 72 competencia di Miss Universe cu a tuma luga na El Salvador.

Durante e ocasion aki, Minister Maduro a expresa su gratitud pa e representacion y exposicion cu Karol Croes a duna Aruba riba e tarima internacional aki.

            ‘Karol Croes no solamente a representa nos isla cu gracia, pero tambe a sa di demostra nos cultura na mundo henter.’ Minister Maduro a bisa: ‘Su participacion den un evento internacional asina prestigioso a crea un sentido di orguyo na nos Pais caminda cu hopi anticipacion tur hende tabata warda su presentacion’.

            ‘E presencia di Karol na e competencia di Miss Universe tabata mas cu un expresion di bunitesa y elegancia; e tabata un muestra di e diversidad y resilencia di nos cultura. Sin duda e tabata un embahador di nos isla, compartiendo nos storia y balornan cu e comunidad global.”

            E Minister tambe a reconoce e trabou duro, dedicacion, y compromiso demostra pa Karol Croes durante su viahe. ‘E caminda di Karol pa e podio di Miss Universe tabata yen di determinacion y trabou duro. Su compromiso pa exelencia ta berdaderamente inspirador’.

            Na final, Minister Maduro a extende su gradicimento di curason na Karol Croes pa su contribucion y pa ta un ehempel pa e hobennan di Aruba. “Nos ta orguyoso di Karol y loke e a logra. Su presentacion ta un ehempel di con talento, dedicacion y un fuerte sentido di identidad por tin un impacto riba tarima mundial”.