Minister Glenbert Croes a anuncia e programa “Aruba Kier Traha” pa e grupo di FASE

The content originally appeared on: Diario

Tin rond di 2.300 persona cu ta hayando FASE — *Gobierno ta preparando tambe pa e consecuencia ora cu loonsubsidie stop


ORANJESTAD (AAN) – Den conferencia di prensa extraordinario, convoca pa gobierno Diamars atardi, Minister di Labor, Energia y Integracion, a elabora tocante e programa “Aruba kier traha”, cu ta dirigi na tur e personanan cu a haya FASE y cu ainda no a logra drenta den e mercado laboral.

            E mandatario a referi na e realidad dificil cu gobierno no ta hayando sosten financiero e luna aki, pa locual gobierno tin cu tuma decisionnan pa por sigui avanza bao e circumstancianan dificil aki.

E dignatario a expresa cu no obstante esaki, mester ta humildemente orguyoso di gobierno di Aruba, cu no obstante e consecuencianan devastador di e pandemia, a haci asina tanto pa nos pueblo, nos comunidad, nos pais, por a sobrevivi e momentonan dificil aki.

            “Pero, en bista cu FASE ta yegando su fin e luna aki, nos mester pone nos hendenan bek na trabao y pesey mes e programa ‘Aruba kier traha’ ta cuminzando. Nos a bin ta preparando esaki.  Nos a premira e momento dificil aki cu nos ta anunciando, y nos ta trahando no solamente pa diseña pa yuda esnan cu ta den FASE ainda, of cu no ta cu FASE y no por a surpasa e momentonan dificil desde aña pasa, ora cu covid-19 a cuminza”, e mandatario a señala.

            E dignatario a bisa cu gobierno ta preparando tambe pa e consecuencia ora cu loonsubsidie stop. “E consecuencia pa comercio y pa cupo di trabao. Y nos mester percura pa nos por reorienta esnan cu a perde trabao, lihe bek riba e mercado laboral.

            Pero nos mester recorda cu e circumstancianan ta cambia riba e mercado laboral, na consecuencia di e pandemia. Ainda tin alrededor di 2.300 persona cu ta hayando FASE, y nos no sa e consecuencia, pa cupo di trabao, y pa e trahadornan tambe, na momento cu loonsubsidie mester stop. Pesey, nos mester stress cu e accion mas grandi di gobierno mester ta e recuperacion financiero, economico, social y laboral di nos pais, y esaki ta di vital importancia den cuadro di pone tur hende bek na trabao”, Minister Glenbert Croes a reitera.

            Minister Croes a reitera tambe cu loke ta di fundamental importancia pa e recuperacion economico di Aruba, ta yuda pone hende bek na trabao, hisando nan capacidad y habilidad pa subi e mercado laboral. E grupo di FASE cu lo haya oportunidad via “Aruba kier traha”, semper tabata tin un relacion laboral, pa lo cual nan tin e mente y experiencia di ta na trabao. E posible dificultad cu por haya ta si, kizas, e funcionnan a cambia, e funcion cu e persona a ocupa talvez no ta existi mas, door di e situacion di pandemia.

            “Pero, realiza cu ‘Aruba kier traha’ ta bo oportunidad pa bo por traha riba bo propio crecemento, bo propio motivacion, bo propio mindset, bo por subi bek na e mercado laboral, y nos mester realiza cu exito di cada un ta den nos propio man”, Minister Glenbert Croes a subraya.

            E cambio di mentalidad cu nos kier promove y mira den nos hendenan, ta pa ta conciente di e retonan cu tin ora cu un funcion laboral no ta existi mas, of el a cambia. El a subraya cu ora di pone un hende na trabao kizas no ta haya di biaha e trabao di su soño, pero considere un stap. Mientras tanto esnan cu no a haya trabao ainda, gobierno ta bay yuda nan cu cursonan.

            Den otro articulo, DIARIO lo trece mas informacion tocante e proyecto di Minister Glenbert Croes.