Minister Geoffrey Wever ta splica tocante e ley pa proteha e consumidor di prestamo financiero

The content originally appeared on: Diario

ORANJESTAD (AAN) — Minister di Economia, Geoffrey Wever, a referi den conferencia di prensa na e introduccion di e Ley “Landsverordening Regeling Consumenten Krediet” cu a wordo aproba siman pasa Diabierna, den Parlamento.

E dignatario a expresa cu esaki si ta den un tono mas positivo, pasobra e ta un bunita ley cu ta na bienestar di e consumidornan (di prestamo financiero), e hende chikito, e personanan cu anteriormente tabata wordo confronta cu prestamonan, na interesnan sumamente halto.

Minister di Economia a menciona cu aworaki, debi na e ley menciona, lo haya proteccion huridico, den e sentido cu ora nan ta fia placa of cumpra un producto den credito, entre otro, e interes cu nan ta paga ta maximaliza.

Aworaki, Minister di Economia a haya e autoridad pa establece e maximo porcentahe y esaki ta un bon momento, unda cu ta bayproteha e consumidor.

Na momento cu un instituto financiero duna un prestamo cu ta mas halto cu e porcentahe maximo, e tin e proteccion huridico den ley, cu posiblemente e ta manda un carta na e instituto financiero bisando cu e lo no paga interes cu ta excede e maximo.

E dignatario a splica cu si gobierno, por ehemplo, pone na 18% y un instituto financiero cobra 24%, e cliente ta bisa cu ta solamente 18% e ta paga, apesar cu e tin un acuerdo firma pa 24%. Y si el a paga 24% e tin derecho di cobra e diferencia ey bek.

“Esaki mi ta kere ta un mehoracion di e posicion di e ciudadanonan, y tambe parti di e ley aki ta cu ta bay bin un sistema di registracion di credito, unda cada instituto financiero mester registra, y ora un persona bay pidi un prestamo.

E organizacion aki mester haci un evaluacion pa wak si e persona cu ta pidi e prestamo tin e capacidad financiero pa paga e prestamo bek. “Pues, akinan nos ta mehora e posicion pasobra hopi biaha por wak cu nan tin, loke na Hulandes nan ta yama ‘overkreditering’. E hendenan tin demasiado debe, unda cu nan bay nan por haya un prestamo, pero e problema ta e fin di luna ey, ora cu tur e personanan cu nan debe acumula”, Minister Wever, titular di Economia, a subraya.

El a agrega cu un situacion asina ta trece problema social, den e hogarnan, e ta origen di trastorno mental, y hasta por yega na adiccion. Door di esaki e consumidor ta bay wordo proteha, ta bin un  evaluacion pa wak si ta apto pa e prestamo of no.