Minister Geoffrey Wever a splica durante workshop di Arubaverse 2.0 e aspectonan legal di Cryptocurrency

The content originally appeared on: Diario

ORANJESTAD (AAN):  Cryptocurrency ta un moneda digital of virtual cu ta uza criptografia pa seguridad y ta opera independientemente di un banco central.

E ta un forma descentralisa di moneda cu ta basa generalmente riba tecnologia di blockchain, un registro distribui y enforsa pa un red disperso di computernan. Nan ta unico den e sentido cu generalmente nan no ta ser emiti door di ningun autoridad (banco) central, haciendo nan teoreticamente immuun na interferencia of manipulacion gubernamental.

            Riba Diaranson, 29 di november, durante di tres edicion di Arubaverse 2.0 na The Hub, den Caya Principal na San Nicolas, Minister Geoffrey Wever a subi podio pa trata e complehidadnan legal di cryptocurrency.

            Un enfoke significante a ser poni riba comprension di con e forma emergente aki di moneda ta ‘fit’ den e cuadro legal y economico di Aruba. Presentacion extenso di Minister Wever a bai profundo den e consideracionnan legal necesario pa e adaptacion y regulacion di monedanan digital dentro di hurisdiccion di Aruba.

            E cambio pa un economia digital ta marca pa un necesidad pa navega camindanan largo pa perfecciona tecnologianan existente. Tin tambe un necesidad urgente pa actualisa nos sistemanan educativo y legislativo pa acomoda desaroyonan tecnologico cu ta transformando con e mundo lo conduci negoshi den futuro.