Minister di Husticia a firma contrato cu Gamma Research pa loke ta e sistema di ESTA

admin

ORANJESTAD  (AAN): Diahuebs Minister di Husticia Arthur Dowers a tene un rueda di prensa pa firmamento pa introduccion di tur e condicionnan pa ESTA pa pais Aruba.

E Minister a firma hunto cu Koos Veel, kende na managing director di e compania Gamma Research.

Dowers a indica cu despues cu recientemente a firma un ‘Intento di Cooperacion’, awor ta firma e contrato mes.

“Nos a palabra cu e compania Gamma, cu ta e desaroyador tambe di e sistema Radex, cu nos kier yega na un sistema caminda cu den futuro nos por garantiza cu un persona cu kier drenta den nos pais, prome cu e yega nos teritorio nos sa cu e ta desea di bin y cu nos por tuma un decision prome cu e bin Aruba, si nos ta haya deseable pa e bin of no”.

“Mi ta sumamente contento cu esaki lo trece un aspecto di seguridad pa pais Aruba y mi a haya diferente pregunta riba durante ultimo dianan riba e importancia di esaki”.

Esaki segun e mandatario, kende a sigui bisa cu e ta kere cu e paso cu a wordo tuma awe, ta un paso cu mas pais ta bay sigui den futuro.

El a sigui bisa cu e ta convenci cu e sistema ta duna un contribucion grandi na reduci e riesgonan di personanan indesea den bo teritorio.

“Aruba ta un pais chikito, pero e presion cu nos tin ta pone cu nos tambe tin cu sigui e pasonan, caminda cu nos por preveni cierto cosnan di sosode”.

“Importante ta tambe pa bo screen mas mihor e personanan cu yega  bo pais”, segun Dowers. “No ta asina cu e sistema aki por kita tur riesgo, sino e ta reduci e riesgo”.

Esaki segun e minister di Husticia, kende a sigui bisa cu den e sistema actual cu tin, ora cu un persona wordo expulsa di Aruba, despues di cierto periodo di aña e por drenta bek. Sinembargo, e sistema nobo cu ta bay wordo uza ta duna autoridadnan e posibilidad cu e sistema por selecta e persona pa no drenta nos pais.

Dowers a indica cu e ta bezig ta papiando cu autoridadnan di otro paisnan den nos region, pa haya acceso na data base-nan mas grandi, pa haya mas informacion y reduci mas ainda e riesgonan pa personanan problematico drenta Aruba.

 

Next Post

Fiscal ta exigi 1 aña y mey pa MC Oz pa abuso di menor di edad

Di esaki 6 luna ta condicional ORANJESTAD (AAN): Diahuebs mainta e homber di 31 aña di inicial J., conoci den pueblo como MC Oz, pues maestro di ceremonia y tambe locutor na emisora local, a presenta dilanti Hues pa duna cuenta pa e delito cu e ta worde sospecha di […]