Minister di Economia kier pa pueblo compronde cu aumento di prijs di gasoline ta debi na desaroyonan internacional

The content originally appeared on: Diario

ORANJESTAD (AAN) – Diahuebs mainta, Minister Geoffrey Wever, titular di Economia, a participa den e conferencia di prensa di gobierno,

den cual el a papia tocante e desaroyonan di prijs di gasoline y tambe a referi na e “Landsverordening Regeling Consumenten Krediet” cu a pasa Diabierna, siman pasa, den Staten.

Aumento di prijs di gasoline:

Minister di Economia a expresa cu sigur tur hende a tuma nota del aumento den prijs di gasoline, como cu e ta un tema cu ta den boca di pueblo; tur hende ta papiando di dje y e ta un punto cu ta preocupa cada un ciudadano, e tin preocupacion di gobierno y logicamente, di su persona.

E dignatario a remarca cu na e lunanan di April y Mei e prijsnan a aumenta drasticamente, riba mercado internacional, y e sistema cu Aruba ta maneha, ta cu e prijsnan di e lunanan anterior ta wordo carga den e luna despues.

“Kiermen cu e aumento di prijs cu nos ta wak awe, ta realiza caba den e luna di Mei. Diaranzon e prijs di gasoline a subi cu 32.3 cen y prijs di diesel a subi cu 1.3 cen, hibando e prijs di gasolin na 3.21 fls y diesel na 2.90 fls. Prijsnan sumamente halto, cu ta un preocupacion no solamente pa comercio, pero pa cada ciudadano di nos pais. Nos sa cu esaki ta bay tin impactonan inflatorio, ta bay tin e posibilidad cu e comerciantenan lo hinke den e prijs. Pues ta cosnan cu ta preocupa nos, y como minister cu ta anuncia e aumento di prijs, e ta mi tarea pa informa nos comunidad, nos ciudadanonan di e desaroyo aki y mi kier pa pueblo compronde cu esaki ta consecuencia di desaroyo internacional, di e guera na Ukraine. Proyeccionnan ta cu como consecuencia di e guera, cu lo no termina prome cu 2023, e prijsnan lo sigui aumenta”, Minister Geoffrey Wever a señala.

E dignatario a indica cu Diaranzon tabata tin proyeccionnan internacional cu prijs di petroleo lo subi te na 140 dollar pa bari mientras cu Diamars tabata na 120 dollar pa bari caba. Pues, e desaroyo internacional tin como consecuencia cu prijsnan lo sigui subi, y door cu Aruba como pais chikito completamente dependiente di e produccion internacional, ta sinti e efecto aki inmediatamente. E mandatario a indica cu diferente biaha el a trece e punto aki dilanti y cu nan a purba cu CFT door di bin cu calculacionnan alternativo, pa wak si gobierno por absorbe un parti di e aumento, pero e conseho di e instancia tabata negativo.

“Nos a  haci diferente calculonan pa wak kico e posibilidadnan ta y hasta nos a bin cu calculonan cu por yama un poco creativo, unda nos a pensa di maximiza e entrada di gasoline pa Aruba, na locual nos a cobra, por ehemplo, na 2019 cu tabata un suma di 80 miyon florin: 24 miyon na BBO y 55 miyon na accijns, basa riba e volumen cu nos a importa”, e mandatario a señala.