Minister Dangui Oduber mustrando riba e importancia di industria di timeshare na Aruba

The content originally appeared on: Diario

ORANJESTAD (AAN)– Diahuebs atardi Minister di Turismo Sr. Dangui Oduber tabata presente na e publicacion di e buki “The Vacation Ownership and Timeshare Industry on Aruba”.


Esaki a tuma lugar na La Cabana Beach Resort y a keda presenta pa Sr. Luigi Heredia president di Aruba Timeshare Association (ATsA).

            Minister Oduber tabata tin e placer di por a dirigi algun palabra na e lidernan den e industria, e propietarionan di timeshare y demas bishitante.

            Minister Oduber a recorda esnan presente con importante e desaroyo di e industria turismo tabata pa contra aresta tur e retonan economico cu Aruba a pasa aden den añanan 80 despues di e ceramento di LAGO. E producto Aruba no por a desaroyo sin e industria di timeshare cu a bira e weso di lombo di e industria di turismo.

            E mandatario a trece dilanti cu na momento cu COVID19 a yega Aruba, Gobierno a haya su mes ta para tur cos. Pero locual a resalta ta cu apesar di e paro aki e industria di timeshare si a mantene su mes firme. E timeshare a keda mantene e grado di ocupacion riba 50% durante e temporada di mas malo den turismo.

            Den esaki e mandatario ta hopi satisfecho pa sa cu e propietarionan di timeshare tabata e ultimonan pa bay y e promenan pa bin bek na Aruba pa asina contribui na un recuperacion acelera di nos turismo.

            Minister Dangui Oduber tin pleno confiansa cu e buki aki lo bay sirbi su proposito, como un herment pa yuda amplia e conocimento di kico ta come y bebe den e mundo tan apasiona di e propietarionan vacacional aki na Aruba.

            E mandatario a gradici studiantenan di e Facultad di Hospitalidad y Turismo di Universidad di Aruba kendenan a duna nan contribucion pa realisa e publicacion di e buki aki.

            Finalmente Minister Oduber a manda palabranan di felicitacion pa su colega Minister Sr. Ursell Arends cu tabata president di ATsA na momento cu a inicia e bunita proyecto aki.